ⴰⵖⴰⵡⴰⵙ ⴰⴷⵍⵙⴰⵏ ⵏ ⵓⵍⵎⵓⴳⴳⴰⵔ ⴰⴳⵔⴰⵖⵍⴰⵏ ⵏ ⵓⵙⴰⵔⵓ ⴰⵎⴰⵣⵉⵖ ⵉⵙⵏⵉ ⵏ ⵡⵓⵔⵖ

ⴳ ⵓ ⵖⴰⵡⴰⵙ ⴰⴷⵍⵙⴰⵏ ⵏ ⵓⵍⵎⵓⴳⴳⴰⵔ ⴰⴳⵔⴰⵖⵍⴰⵏ ⵏ ⵓⵙⴰⵔⵓ ⴰⵎⴰⵣⵉⵖ ⵉⵙⵏⵉ ⵏ ⵡⵓⵔⵖ, ⴳ ⵜⵙⵙⵓⵜⵍⵜⵏⵏⵙ ⵜⵉⵙⵙ 13, ⵔⴰⴷ ⵏⵏ ⴳⵉⵙ ⵜⴰⴼⵉⵎ ⵢⴰⵜ ⵜⴱⵖⵓⵔⵜ ⵉⵣⵣⵓⴳⴰⵣⵏ ⴷ ⵓⵙⵙⵎⵏⵉⴷ ⵏ ⵉⵙⵓⵔⴰ ⵏ ⵜⵙⴷⵎⵓⵜ ⴷ ⵉⵙⵓⵔⴰ ⵓⵏⵜⵉⵎⵏ, ⵡⵉⴷ ⵖⵣⵣⵉⴼⵏⵉⵏ ⵓⵍⴰ ⵡⵉⴷ ⴳⵣⵣⵓⵍⵏⵉⵏ. ⵣⵣⵖ ⵜⴱⵖⵔⵜ ⵢⵓⵎⴰ ⵓⵖⴰⵡⴰⵙ ⴰⴷ, ⵉⵍⵍⴰ ⵎⴰⵚⵟⵕ ⴽⵍⴰⵚ ⴷ ⵓⵎⵙⵙⵓⴼⴼⵖ ⴰⵄⵔⵔⵉⵎ ⵄⴱⴷ ⵔⵔⵃⵎⴰⵏ ⵕⵕⴰⵢⵚ, ⴰⵎⵙⵏⴼⵍⵓⵍ ⵏ ⵜⵉⵔⵎⵉⵜ ⵏ “ⵍⵄⴰⴷⵉⵢⵓⵏ” ⴰⵙⵙ ⵏ ⴰⵙⵉⵎⵡⴰⵙ 30 ⵛⵓⵜⴰⵏⴱⵉⵔ 2022 ⴳ ⵜⵙⵔⴰⴳⵜ ⵜⵉⵙⵙ 10 ⵏ ⵜⴰⵢⵍⴳⵉ.
ⵎⴰⴷ ⵉⵥⵍⵉⵏ ⵙ ⵓⵙⵙⵉⵣⵡⵍ, ⵔⴰⴷ ⵉⵥⵍⵉ ⵓⵍⵎⵓⴳⴳⴰⵔ ⴰⴳⵔⴰⵖⵍⴰⵏ ⵏ ⵓⵙⴰⵔⵓ ⴰⵎⴰⵣⵉⵖ ⵉⵙⵏⵉ ⵏ ⵡⵓⵔⵖ, ⵢⴰⵜ ⵜⵙⴷⴷⴰⵔⵜ ⵉ ⵓⵙⵙⵉⵣⵡⵍ ⵏ ⵓⴷⵍⵉⵙⵉ “ⵜⵉⴼⴰⵡⵉⵏ” ⵏ ⵜⵎⴰⵔⴰⵜ ⴷ ⵜⵏⴰⵖⵎⴰⵙⵜ ⵅⴰⴷⵉⵊⴰ ⵔⵛⵛⵓⵇ, ⵍⵍⵉ ⴰⵙ ⴷ ⵉⵙⵙⴼⴰⵖ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵎⴰ ⴰⵏⵏ ⵙ ⵜⴷⵔⴰⵡⵜ ⵏ ⵓⵎⵓⵙⵏⴰⵡ ⵃⵎⴰⴷ ⵄⴰⵚⵉⴷ, ⴰⵎⴰⵔⴰ ⵎⵓⵃⵎⵎⴰⴷ ⵎⵙⵜⴰⵡⵉ, ⴷ ⵓⵙⵍⵎⴰⴷ ⴰⵎⵔⵣⵓ ⴼⵓⴰⴷ ⴰⵥⵕⵡⴰⵍ, ⵔⴰⴷ ⵉⵙⵡⵓⴷⴷⵓ ⵉⴳⵉⵡⵔ ⴰⴷ; ⴰⵙⵍⵎⴰⴷ ⵏ ⵓⵙⵍⵎⴷ ⴰⵏⴰⴼⵍⵍⴰ ⴳ ⵓⵙⵉⵏⴰⴳ ⴰⵏⴰⵎⵓⵔ ⵉ ⵜⵎⴰⵙⵙⴰⵏⵉⵏ ⵏ ⵢⵉⴷⵔⵉⵣⵏ ⴷ ⵜⴰⵢⵙⵉ ⵎⵓⵃⵎⵎⴰⴷ ⵚⵍⵍⵓ, ⵎⴰ ⴰⵏⵏ ⴳ ⵡⴰⵙⵙ ⵏ ⴰⵚⵉⴹⵢⴰⵙ 01 ⴽⵟⵓⴱⵕ 2022 ⴳ ⵜⵙⵔⴰⴳⵜ ⵜⵉⵙⵙ 10 ⵏ ⵜⴰⵢⵍⴳⵉ.
ⵔⴰⴷ ⵜⵉⵍⵉ ⴰⵡⴷ ⵢⴰⵜ ⵜⵉⵏⵏⴰⵡⵜ ⴷⴷⴰⵡ ⵓⵣⵡⵍ: “ ⵜⴰⵡⵙⵏⴰ ⴷ ⵡⴰⵏⴰⵡⵏ ⵏ ⵓⵙⴰⵙⴳⴷ: ⵏⵖ ⴷ ⵙⵓⵙ ⵎⴳⴰⵍ ⵜⴰⵢⴷⵢⵓⵍⵓⵊⵜ ⵏ ⵢⵉⵎⵉⵏⴳ” ⵙ ⵜⴷⵔⴰⵡⵜ ⵏ ⵜⵏⴰⵖⵎⴰⵙⵜ ⴼⴰⵟⵉⵎⴰ ⵓⵛⵛⵔⴰⵄ, ⴰⵏⴰⴼⵔⴰⵏ ⵏ ⵙⵙⵉⵏⵉⵎⴰ ⵎⵓⵃⵎⵎⴰⴷ ⴱⵍⵍⵓⵛ, ⴰⵎⴰⵔⴰ ⴷ ⵓⵏⴰⴼⵔⴰⵏ ⵎⵙⵄⵓⴷ ⴱⵓⴳⵕⵏ, ⴰⵎⵔⵣⵓ ⴳ ⵜⴰⵢⵙⵉ ⵜⴰⵎⴰⵣⵉⵖⵜ ⵙⴰⵄⵉⴷ ⵊⴰⵍⵉⵍ, ⴷ ⵓⵙⵉⵏⴰⵔⵉⵙⵜ ⴷ ⵓⵎⵙⵙⵓⴼⴼⵖ ⵃⴰⴽⵉⵎ ⵇⴱⴱⴰⴱⵉ ⴰⵙⵙ ⵏ ⴰⵢⵏⴰⵙ 03 ⴽⵟⵓⴱⵕ ⴳ ⵜⵙⵔⴰⴳⵜ ⵜⵉⵙⵙ 10 ⵏ ⵜⴰⵢⵍⴳⵉ.
ⵔⴰⴷ ⵉⵍⵉⵏⵜ ⴳ ⵜⴰⵎⵡⵉⵏ ⵏ ⵓⵍⵎⵓⴳⴳⴰⵔ ⴰⴳⵔⴰⵖⵍⴰⵏ ⵏ ⵓⵙⴰⵔⵓ ⴰⵎⴰⵣⵉⵖ ⵉⵙⵏⵉ ⵏ ⵡⵓⵔⵖ, ⵢⴰⵏ ⵓⵙⴼⵙⵔ ⵏ ⵡⵓⵏⵓⵖⵏ ⵏ ⵓⴽⴰⵔⵉⴽⴰⵜⵓⵔ ⵏ ⵓⵎⴰⵏⵏⴰⵖ ⵖⵉⵍⴰⵙ ⵄⵉⵏⵏⵓⵛ, ⵎⴰ ⴰⵏⵏ ⴳ ⵓⵙⴰⵔⴰⴳ ⵏ ⵙⵙⵉⵏⵉⵎⴰ ⵚⴰⵃⴰⵔⴰ ⴽⵔⴰ ⵉⴽⴽⴰ ⵓⵍⵎⵓⴳⴳⴰⵔ ⵉⵍⵍⴰ.
ⴷ ⵉⵇⵇⴰⵏ ⴷ ⴰⴷ ⵏⴱⴷⵔ ⵎⴰⵙⴷ ⴰⵍⵎⵓⴳⴳⴰⵔ ⴰⴳⵔⴰⵖⵍⴰⵏ ⵏ ⵓⵙⴰⵔⵓ ⴰⵎⴰⵣⵉⵖ ⵉⵙⵏⵉ ⵏ ⵡⵓⵔⵖ, ⴳ ⵜⵙⵙⵓⵜⵍⵜ ⵏⵏⵙ ⵜⵉⵙⵙ 13 ⵔⴰⴷ ⵉⵣⵣⵔⵉ ⵎⴰⴷ ⵉⵜⵜⴳⴳⴰⵏ 36 ⵏ ⵓⵙⴰⵔⵓ ⵍⵍⵉ ⵉⵙⵙⴰⵔⵏ ⴳ ⵜⵙⵎⵖⵓⵔⵜ ⵏ ⵓⵙⴰⵔⵓ ⵓⵏⵜⵉⵎ ⴷ ⵡⵉⵏ ⵜⵙⴷⵎⵓⵜ ⵙ ⵡⴰⵏⴰⵡⵏ ⵏⵏ; ⴰⴳⵯⵣⵍⴰⵍ ⴷ ⵓⵖⵣⵣⴰⴼ. ⴷ ⵜⵙⵎⵖⵓⵔⵜ ⵜⴰⵏⴰⵎⵓⵔⵜ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵍⵍⵉ ⵢⴰⴽⴽⴰ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ.
ⵜⴰⵙⵙⵓⵍⵜ ⴰⴷ ⵏ ⵓⵍⵎⵓⴳⴳⴰⵔ ⴰⴳⵔⴰⵖⵍⴰⵏ ⵏ ⵓⵙⴰⵔⵓ ⴰⵎⴰⵣⵉⵖ ⵉⵙⵏⵉ ⵏ ⵡⵓⵔⵖ, ⵔⴰⴷ ⵜⵜⵓⵏⵎⴰⵍⴰ ⵙ ⵡⴰⵙⵙⴰⵔ ⴷ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴷ ⵓⵙⵇⵇⵉⵎ ⴰⵖⵉⵡⴰⵏ ⴷ ⵜⵎⵏⴰⴳⴹⵜ ⵏ ⵙⵓⵙ ⵎⴰⵙⵙⴰ ⴷ ⵙ ⵜⵡⵉⵙⵉ ⵏ ⵡⴰⵎⵎⴰⵙ ⵏ ⵙⵙⵉⵏⵉⵎⴰ ⴰⵎⵖⵔⵉⴱⵉ.
ⴷ ⵔⴰⴷ ⴰⴽⴽⵯ ⵜⵜⵓⵙⴽⴰⵔⵏ ⵉⵎⵓⵙⵙⵓⵜⵏ ⴷ ⵜⵉⵍⴰⵍ ⵏ ⵓⵍⵎⵓⴳⴳⴰⵔ ⴰⴳⵔⴰⵖⵍⴰⵏ ⵏ ⵓⵙⴰⵔⵓ ⴰⵎⴰⵣⵉⵖ ⵉⵙⵏⵉ ⵏ ⵡⵓⵔⵖ, ⴽⵓ ⵜⴰⵢⵍⴳⵉ ⵙⴳ 29 ⵛⵓⵜⴰⵏⴱⵉⵔ ⴰⵔ 03 ⴽⵟⵓⴱⵕ 2022 ⴳ ⵙⵙⵉⵏⵉⵎⴰ ⵚⴰⵃⴰⵕⴰ ⴳ ⵜⵓⴷⴷⵓⵔⵜ ⵏ ⵜⴰⵍⴱⵔⵊⵜ.