..ⴰⵙⵎⵎⴰⵍ : ⵉⵥⵍⵉⵏ ⵙ ⵜⵎⴰⵢⵏⵓⵜⵉⵏ ⵏ ⵓⵙⴰⵡⵓⵔ ⵏ ⵓⵙⵓⵖⵍ ⵙⴳ ⴷ ⵙ ⵜⵎⴰⵣⵉⵖⵜ ⴳ ⵓⵙⵇⵇⵉⵎ ⵏ ⵉⵎⴰⵔⴰⵏ

ⵜⴹⴼⵕ ⵜⴰⴹⴰ ⵜⴰⵎⵖⵔⴰⴱⵉⵜ ⵏ ⵜⵎⵏⴰⴳⴰⵔⵉⵏ ⵜⵉⵏⴰⵎⵓⵔⵉⵏ ⵉⵜⵜⵡⴰⵙⵏⵏ ⵙ ⵓⵙⴳⵣⵍ ⵙ ⵜⴰⴹⴰ ⵜⴰⵎⵖⵔⴰⴱⵉⵜ, ⵙ ⵜⴰⵡⵉⵜ ⵉⴳⴳⵓⵜⵏ ⵜⵉⵎⴰⵢⵏⵓⵜⵉⵏ ⵏ ⵓⵙⴰⵡⵓⵔ ⵏ ⵓⵙⵓⵖⵍ ⵙⴳ ⴷ ⵙ ⵜⵎⴰⵣⵉⵖⵜ ⴳ ⵓⵙⵇⵇⵉⵎ ⵏ ⵉⵎⴰⵔⴰⵏ, ⵎⴽⵍⵍⵉ ⵉⵙⵙⵉⵎⵖⵓⵔ ⴰⵍⵖⵓ ⵏ ⵓⵙⵇⵇⵉⵎ ⵏ ⵉⵎⴰⵔⴰⵏ ⵉⵣⴷⵉⵏ ⴷ ⵓⵎⵃⵉⵣⵡⴰⵔ ⵏ ⵓⵙⵡⵓⵔⵉ ⵏ ⵚⴹⵉⵚ ⵉⵎⴹⴼⵕⵏ ⵉⵎⵙⵙⵓⴳⴰⵔ ⵉⵎⵓⴼⴰⵢⵏ ⴰⴼⴰⴷ ⴰⴷ ⵜⵜⴳⴳⵏ ⵜⴰⵡⵓⵔⵉ ⵏ ⵓⵙⵓⵖⵍ ⴰⴷⵖⵢⴰⵏ ⴷ ⵓⵎⴰⵔⴰⵢ ⵉ ⵜⵡⵓⵔⵉⵡⵉⵏ ⵏ ⵓⵙⵇⵇⵉⵎ ⵙⴳ ⴷ ⵙ ⵜⵎⴰⵣⵉⵖⵜ.

ⵉⴷⴷⵖ ⵜⵉⵏⴷⵉ ⵉⵍⵍⴰⵏ ⴷⴰⵔ ⵓⵍⵖⵓ ⴰⴷ ⵙ ⵎⴰⴷ ⵉⵥⵍⵉⵏ ⵙ ⵓⵙⴰⵡⵓⵔ ⵏ ⵓⵙⵎⵀⵍ ⵏ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ, ⴷⴰ ⵜⴻⵜⵜⵍⴰⵖⵉ ⵜⴰⴹⴰ ⵜⴰⵎⵖⵔⴰⴱⵉⵜ ⵉ ⵓⵎⵏⴰⴷ ⴰⵎⴰⵜⴰⵢ ⴰⵢⴷ ⵉⴷⴷⴰⵏ:

• ⴷⴰ ⵜⴻⵜⵜⵣⵎⵎⵉⵎ ⴰⵎⵔⴰⵔⴰ ⴰⵎⴰⵍⴰⵡ ⵏ ⵓⵙⵇⵇⵉⵎ ⵏ ⵉⵎⴰⵔⴰⵏ ⴰⴽⴷ ⵜⴰⵏⵏⴰⵢⵉⵏ ⵍⵍⵉ ⵅⴼ ⵙⵉⵡⵍⵏⵜ ⵜⵎⴰⴷⴷⴰⵙⵉⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵉⵏⵖⵎⴰⵙⵏ, ⴰⴷⴷⴰⵢ ⵏ ⵓⵙⵙⵏⵜⵉ ⵏ ⵓⵙⵇⵇⵉⵎ ⴰⵙⵙ ⵏ ⴰⵢⵏⴰⵙ 11 ⵉⴱⵔⵉⵔ 2022, ⴳ ⵓⵙⵓⵖⵍ ⵙⴳ ⴷ ⵙ ⵜⵎⴰⵣⵉⵖⵜ, ⵉⴷⴷⵖ ⵜⴰⴹⴰ ⵜⴰⵎⵖⵔⴰⴱⵉⵜ ⴳ ⵢⴰⵏ ⵓⵙⵎⵎⴰⵍ ⵏⵏⵙ ⵜⵉⵡⵉ ⴷ ⵎⴰⵙⴷ ⵜⴰⵙⵓⵔⵉⴼⵜ ⵏ ⵡⴰⵙⵙ ⵏ 11 ⵉⴱⵔⵉⵔ ⵉⵣⵔⵉⵏ ⵜⴳⴰ ⵜⴰⵎⴰⵍⴰⵡⵜ ⴷ ⵜⵎⵇⵇⵔⴰⵏⵜⴳ ⵓⵙⴰⴽⴰ ⵏ ⵓⵙⴰⵡⵓⵔ ⴰⵏⴰⵎⵓⵔ ⵏ ⵓⵙⵎⵀⵍ ⵏ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ, ⵎⴰⵛⴰ ⴳ ⵡⴰⴽⵓⴷ ⴰⵏⵏ ⵏⵉⵜ ⵜⵙⴷⴷⵉⴷ ⵅⴼ ⴽⵔⴰ ⵏ ⵜⴰⵏⵏⴰⵢⵉⵏ ⵉⵣⴷⵉⵏ ⴷ ⵓⵙⵖⵓⴷⵓ ⵏ ⵓⵙⴰⵡⵓⵔ ⴰⴷ ⴰⴼⴰⴷ ⴰⴷ ⵉⴳ ⴳ ⵓⵙⵡⵉⵔ ⵏ ⵉⵏⴰⵥⴰⵕⵏ ⵍⵍⴰⵏⵉⵏ.
• ⴰⵍⵖⵓ ⵅⴼ ⵓⵎⵃⵉⵣⵡⴰⵔ ⴰⴷ, ⴷⴰ ⵉⵜⵜⵙⴷⴷⵉⴷ ⴰⵢⵍⵍⵉ ⵅⴼ ⵏⵙⵉⵡⵍ ⴳ ⵓⵙⵎⵎⴰⵍ ⵉⵣⵔⵉⵏ ⵉⴷⴷⵖ ⵏⴻⵏⵏⴰ ⵎⴰⵙ ⴷ “ ⴰⵎⵔⴰⵔⴰ ⵏ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵏ ⵉⵎⴰⵔⴰⵏ ⴰⴽⴷ ⵜⴰⵏⵏⴰⵢⵉⵏ ⵏ ⵜⵎⵙⵎⵓⵏⵉⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵓⵏⵏⵓⵕⵥⵎ ⵅⴼ ⵉⴼⵔⴷⴰⵙ ⵏⵏⵙ, ⵉⵣⵎⵔ ⴰⴷ ⵉⴳⴳ ⴽⵕⴰⴹ ⵉⵡⵜⵜⴰⵙⵏ: ⴰⵎⵣⵡⴰⵔⵓ, ⴰⵙⵓⴷⵙ ⵏ ⵓⵙⴰⵡⵓⵔ ⴰⴷ ⴰⵎⴰⴷⴷⴰⵔ ⵙ ⵡⴰⵔⵔⴰⵣ ⵏⵏⵙ ⴷⴰⵔ ⵉⴼⵔⴷⴰⵙ ⴰⴽⴽⵯ ⵏ ⵡⴰⵎⵓⵏ ⵏⵏⵖ, ⵡⵉⵙⵙ ⵙⵉⵏ, ⴰⵙⵓⵜⵜⴳ ⵏⵏⵙ ⵉⴱⴷⴷⵏ ⵅⴼ ⵡⵉⴷ ⴷⴰⵔ ⵜⵓⴳⴳⴰ ⵏ ⵜⵣⵓⵏⵉⵡⵉⵏ ⴷ ⵉⵙⴰⴽⴰⵜⵏ ⵏ ⵜⵖⵓⵔⵉⵡⵉⵏ ⵜⵉⵎⴰⵣⵉⵖⵉⵏ ⴳ ⵜⵙⴷⴰⵡⵉⵢⵉⵏ ⵜⵉⵎⵖⵔⵉⴱⵉⵢⵉⵏ, ⵡⵉⵙⵙ ⴽⵕⴰⴹ, ⴰⴼⵔⴰⴳ ⵏⵏⵙ ⵙ ⵜⴰⵎⵓⵏⵜ ⵏ ⵜⵣⵎⵎⴰⵔ ⵏ ⵉⵎⴰⵣⵣⴰⵍⵏ ⴰⴽⴽⵯ ⵉⵎⵔⵙⵉⵍⵏ ⴷ ⵉⵙⵔⵜⴰⵏⵏ ⴷ ⵓⵖⵔⵉⵎⵏ”.
• ⵜⴰⵙⵖⵣⵏⵜ ⵏ ⵜⵙⵓⴳⴰⵔ ⵏ ⵡⵉⴷ ⴷⴰⵔ ⵜⵓⴳⴳⴰ ⵜⵣⵓⵏⵉⵡⵉⵏ ⴷ ⵉⵙⴰⴽⴰⵜⵏ ⵏ ⵜⵖⵓⵔⵉⵡⵉⵏ ⵜⵉⵎⴰⵣⵉⵖⵉⵏ, ⵉⵣⵎⵔ ⴰⴷ ⵉⵙⴳⵓⴷⵉ ⵜⵉⵔⵎⵉⵜⵉⵏ ⴷ ⵜⵎⵙⴽⵉⵔⵉⵏ ⵜⵉⵎⵓⴼⴰⵢⵉⵏ ⴰⵎⵏⴰⵍⴰ ⵏ ⵉⵏⴰⵥⴰⵕⵏ ⵏⵏⴰ ⵉⵜⵜⵉⵍⵉⵏ ⴳ ⵓⵎⵢⴰⵡⴰⴹ ⴰⴽⴷ ⵉⵏⵎⵓⵔⵉⵜⵏ ⵙ ⵜⵓⵜⵍⴰⵢⵜ ⵏⵏⵙⵏ ⵜⴰⵎⴰⵣⵉⵖⵜ, ⴷ ⵓⴹⴰⴽⴰⵍ ⵏ ⵜⵙⵉⵙⵜⴰⵏⵜ ⵏ ⵉⵡⵜⵜⴰⵙⵏ ⵙⴳ ⵓⵎⵢⴰⵡⴰⴹ ⴰⴳⴷⵓⴷⴰⵏ, ⵙ ⵓⵎⵙⴰⵙⴰ ⴰⴽⴷ ⴰⵎⵓⵜⵜⵉ ⴰⵎⵉⵖⵉⵙ ⵙⴳ ⵉⵡⵏⵏⵉⵜⵏ ⵉⵙⵏⵉⵍⵙⵏ ⵙ ⵜⵎⴰⵣⵉⵖⵜ ⵜⴰⵏⴰⵡⴰⵢⵜ.
• ⵉⵣⵎⵔ ⵓⵙⵓⵖⵍ ⴰⴷⵖⵢⴰⵏ ⴷ ⵓⵎⵉⵔⴰⵢ ⴳ ⵓⵙⵇⵇⵉⵎⵏ ⵏ ⵉⵎⴰⵔⴰⵏ ⴰⴷ ⵢⴰⵡⵙ ⴳ ⵢⵉⵡⴹ ⴳ ⵢⵉⵎⴰⵍ ⵜⴰⵎⴰⵣⵉⵖⵜ ⵜⴰⵏⴰⵡⴰⵢⵜ ⵢⵓⵜⵏ ⵙ ⵉⵥⵓⵕⴰⵏ ⴳ ⵡⴰⵎⵓⵏ, ⵉⵖ ⵏⵏⵓⵕⵥⵎⵏ ⵉⵙⴰⵡⵓⵔⵏ ⵢⴰⴹⵏ ⴳ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⴷ ⵉⴳⵔⴰⵏ ⵓⵏⴱⵉⴹⵏ ⵢⴰⴹⵏ, ⵉⵍⵉⵏⵜ ⵜⵎⵏⴰⴳⴰⵔⵉⵏ ⵏⴳⵔ ⵉⵙⴰⵡⵓⵔⵏ ⴰⴷ ⴽⵓⵍⵍⵓⵜⵏ ⴳ ⵓⵙⴰⵜⵉ ⵏ ⵜⵡⵓⵔⵉ ⵜⴰⵎⵙⵉⴷⴼⵜ ⴷⴰ ⵉⵜⵜⴳⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵢⴰⵜ ⵜⵉⵍⴰⵍⵜ ⵜⴰⵏⴰⵎⵎⴰⵙⵜ, ⵢⵉⵍⵉ ⴰⵡⴷ ⵓⵏⵏⵓⵕⵥⵎ ⵅⴼ ⵜⵎⵔⵙⴰⵍ ⵜⵉⵎⵙⴷⴰⵡⵉⵏ, ⴷ ⵉⵎⵙⵏⴼⵍⵓⵍⵏ ⴳ ⵜⵉⵔⵔⴰ ⴷ ⵓⵙⵓⵖⵍ ⵙ ⵜⵎⴰⵣⵉⵖⵜ.