waba εli bu iswingimn issafan

  waba εli bu tfust, iga yan ufddam mi tflay tiddi, izgg^waɣ udm nns, da iswingim kigan ar ittini tannayin nns i mddn. da iswingim? ig bu isqsitn iggudin? abda iḥḍa ignna ula itran? abda ar ittini maɣ tad ad ur tg imk i ? maɣ tann ad ur tg imk i? iggut maɣ g imi n waba εli.

 ar ittini maɣ ad yaf wann? maɣ ad gɣ imk i? matta wann? matta nkkin? ma ad riɣ anaruz n awd yan? izayd as akk^w s tmnaḍin inna :” llah ṛbbi idd is ur yuf wnna immutn, anaruz wanna tn yiwin”.

 waba εli tudrt nns tga akk^w isqsitn d inaruzn. mqqar imẓẓiy iwssir as iɣf, imllul as wazzar zund adfl. imllul as iɣf ɣir s isqsitn nna digs iεtan.

yan wass g wussan n tfsut, inkr zik, iεayn turtit n bba-hllu nns, ar isksiw ildjign d isk^Wla; ha nn tazart! ha nn ddilit tga amalu i udɣar! imikk inna diɣ ad iswingm, yini ka n isqsitn, inna d nit iddɣ immutr asklu n dduj datas ula igiman n tɣṣayt, immatr tn nik allig asn ikks taɣtft. imikk inna :”  mr i tcawiṛd a ṛbbi, a bu itran! ha nn asklu ad n dduj nna izurn, iṣḥu ad mi ilaq ad ittaru tiɣṣayin ad tixatarin nna imqqurn, ima igiman ad n tɣṣayt, igan ɣir ka n iflan, ilaq asn ad day ttarun kra n taddujin.” isul ar isawal imikk tnḍṛ d ɣifs yat taddujt druɣ ad tfllg iɣf nns, innḍu d nik g udɣar inna : “ a aɛri inu a ṛbbi ma ad i ɣir ur tcawiṛḍ?”