Tabrat n tifawt

OMAR AIT SAID

 g imir[1] n unbdu[2], ar trqqa tafukt, nun iẓṛan, tili trɣi, inwa imndi, mgrn mddn timẓin srutn, gn timɣriwin, alint tɣratin s ignwan.

 g imir n unbdu, da ttirin mddn ad ddun s uftas, s tmizar g illa yil, mara ad ccfn g ummda axatar n yil mara ad srwwḥn iɣsan nnsn. maca llan awd winna ittddun day s udrar munn d isaffn d iɣbula ar tkkan xf iɣrman yan s yan.

 Muḥa ntta ur t issusim awd yan imk, ur iri ad iddu s yil ula ad iɛayn adrar. Muḥa ntta ulin as ibawn, abda izɛf, da ittini yan wawal:” nɣra allig ncib, nḍṛ afus i winna ur issinn awd ad aran assaɣ nnsn” muḥa iddɣ ikka kigan n isgg^w asn g tsdawit yamẓ tiyafutin ula id ddiblumat yattyn d ur ta yufi tawuri g tmazirt nns d ur yufi ad isskr aynna ira ula ad yini aynna ira g tmazirt aynnaɣ ad g da ittini:” maɣ mani d kkiɣ? maɣ mani g d gmiɣ? awi i d a tilelli siwl i d a tilelli awal lliɣ i iddan, irgzn lliɣ nɣan, tifinaɣ lliɣ i izlan, akal d usklu winu ayd gan.

yan wass inna :” izwar d uswingm awal” iswingm kigan inna :”ufiɣ tt ad dduɣ awd nkk ad nnṭuɣ s tmizar n bṛṛa, dinn ad g llan izrfan, dinn ad g nniɣ ad iliɣ, dinn ad g inna uldjig inu ad fsun, manza k a aɣrrabu n tlelli! manza k ad i nn tawim! ṛmiɣ timlillay n umɣar, ṛmiɣ tikrkas n ujrray, ṛmiɣ iwaliwn n bu wamar, riɣ tilelli ur t nffir i awwdyan, riɣ tamaziɣt ils inw ayd gan.

        inkr Muḥa ar ismunu iqaridn ɣur udmawn nna digs iḥnnan yumẓ kra ɣur Mmaḥllu nns yamẓ kra dar Mma nns yamz kra ɣur umddakk^wl nns ɛli, yamẓ kra ɣur xals, amuddu nns ira ad yili ass n usamass.

           tifawt zik, imṣafaḍ akk^w d imddukkal nns d ma g akk^w  illa aḍu d ma ayd as akk^w igan ka. Mma nns tgg^wd ɣifs tawda tamqrant acku ggudin winna yad iddan imikk ur d aɣuln, gn tamatca i islman. ibbas ula ntta ur as d yusi ad iddu Muḥa.

          ddag ilkm wass n twada n Muḥa tifawt zik, tlkm d nik yat tbrat tamaynut, yiwi tt d bu lbuṣṭa, yan ufddam arjdal ittnayn yan uzlalam yan umuṭuṛ, yawi t d tifawt, irzm tt Muḥa ad tt iɣr, yaf tt nn nik at tuzn as tt d yat tmawast.
ma ad as nnan g tbrat! nnan as mass Muḥa n ayt ḥsayn nkk^wni tamawast tanamurt n uslmd amnzu ad awn nɣr ad didnɣ tilim g yigr n usslmd amnzu n imẓẓan, tumum amass n islmadn imaynutn nna iran ad yili asgg^was a. inna d nik bbas s yan wawal axatar inna d ha nn awal wadda t igan!! ur d ad nrgg^wl !! ur d tarula ur d ad najj timizar nnɣ xwant, tgr digs mays yat tɣrit tssrgag akkw akal, sllan as ayt ignna ula ayt wakal munn d diɣ iɣrman alint diɣ tɣratin ḍṛn aḥidus.

PAR OMAR AIT SAID

——————————–

[1] Imir : la saison.

[2]  Unbdu : anbdu la saison d’été.