الأمازيغية

 تيبراتين كَزولنين،  تابرات تيس 10 : ءاجــــديـــــكَ

يورات مصطفى مازّي//

… ءاجديكَ ، ءيكَا وين يان ءوفوس ، ءيغ فلاس كَوتن ءيفاسن ، ءار ءيطجّو ، ءورا سول ءيتكَّا ماد ءيژرا يان … مقارد ءافولكي نس ءارت ءيفال ، ءيغاماد زوند لكاس ، يانت يوفان ، ءار زغ كَيس سان …

**ماني مو سول كَان؟؟؟**

– تيدرفيت(1) ءايان ءا ماس

– تيدرفيت؟؟

– غايان ءاسا تينين

كيكَان ءاس سناحيا تيدرفيت ن-تيفاوت د تين تيلاس ،  ءيطل ءوفكَان ءي ءيخف نس س-مارور ءيقن فوسوينكَم نس ضفرن لكزدابات رولن ءي تيلاوت …

ءاجديكَ نورتان ، ءورت جو ساسوا دوين تامان واسيف … ءامزوارو ، ءيژيل ، ييلي ءاتيكَ ، يانت ءيران ، ءيسن مانين سي تكان ءافاد ءاد ءيكَ وينسن … ءاما ويس 2 ، يانت يوفان ءاوينت ، ءيغتاك ءور ييوي يان ، ياويت واسيف… كران واتيكَ ءورتن لين …

طجا لوقت ، تكوسو طوجوت توكَت ن-ءيكاليون تسنتين ءابريد نس س-ءورتان تكوسو كَيسن كيكَان د-ءورتي فسوسنين …

**ماتا تودرت ءاد؟؟؟**

– تودرت ن-ءيزعضاض ، تودرت ن-ءيضان ، تودرت ن-ءيمودار(2) … ترغا تاكات ، ءيجهل ءومودر(3) ، ءور سول ءيسفاو يات

– ماغ جو يادلي ءيسفاو ءافاد ءاد ءيسفاو غيلاد؟ تيلاس كاغ بدا لان ، تاسداوت(4) يوكَان(5) ءاغا بدا تبرَّامن ، نتات ءاد كَيسن ءيسكرن غيكان ، د ءيكَوت ماد كولو كَيسن تسكر … ءاشكو ءور جو ءورمن ءاد زغ كَيس فوغن والا سوينكَيمن غ-ماد ءيلان غ-برا نس

– بْنّْجْنْ

– ءورد ءيس هلي بنجن ، ءيس ءاك دُّوقرن ، تاتّن(6) ءاكولو كَان ، ءانلي(7) نسن ءار ءيسووري غار غ-كرا لي ءور ءيكَان يات … د ءيغ ژران كران يان ءورتن ءيرواس ، ءورات تيحميلن ، د ءارت كولو سمالاين ءاراس تكَان طيرت

**كَ يان زغ تاتن ، تادجيت تيلاس ءاك تكوسو ، نغ فلاك ءولن ءاسباقس ، ضفرنك ءاك فضون **

كيكَان دومكراز ءاد ءيلان غوماضال ءاد غ-ندر ، ماش ءاود نتنين ءورتن كولو ساسوا … ءيلا مادار يان ءورتي ءار كَيس ءيسوا ءاجديك نس تودرت نس كولوت ، ييلي مادار توكَت نورتان ، كرايكَات ضور د مان ءاجديكَ ءاد كَيس نسّْوان …

ءامزوارو ، مقار تيد ءيحادا كران ءوجديكَ ياضنين ، ءاراس ءيتانف ، ءار زغ كَيس ءيتروال … ءاما ويس 2 ، ءار نين ءي تكَا ءيضارن نس ءار دار ءيجديكَن ياضنين ، ءيسمدي ياسن ءيفاسن … ءيغ ءيفسوس ءوجديكَ ، ءوسينت وامان … ءيغ ءيژاي ءيسكر سلحساب نورتي داغد مغين … ءاراس تقسن ، ءيرزم ءاسن ، ءوراتن سول ءيتحيدي…

**ءاجديكَ ءيژيلن ، ءور ءيسغاوسا س- ءيفريكَ والا ءيوتا ءيغور ءيحاضر باب نس … سكرن بدا سلحساب نس ءوراتن ءيتحادا كَار ءوفوس والا سمديناسن تينزار(8) نسن ءاتن كضون …**

ءاسوينكَم ءور كَين يان ، ءولاون ، ءور كولوغوسن والا فاون …

ءيلا ماد ءيكَان بابن تيكْرَّاس(9) ، ييلي ماد ءيكَان بابن ءوجنجم(10) كَار تاغاوسا ءوراتن تحادان …

**تابرات ، غنكَر ءيفاسن نك ، نفلاك ءاوال ءيكَوران**

—————-

(1)تيدرفيت : الحرية

(2)ءيمودار : الحيوانات

(3)ءامودر : حيوان

(4)تاسداوت : حلقة

(5)يوكَان : مفرغة

(6)تاتن : أغنام

(7)ءانلي : العقل

(8)تينزار : أنف

(9)تيكْرَّاس : الخيانة

(10)ءاجّْنجْم : الوفاء

أظهر المزيد

مقالات مرتبطة

اترك رد

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

Pin It on Pinterest

إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock
%d مدونون معجبون بهذه: