BAQCHICH / ⴱⴰⵇⵛⵉⵛ
OMAR AIT SAID//
iga argaz agwzzal, bu tẓnnaṛt tagwzzalt , tddrɣl as yat tiṭṭ. izdɣ aflla n udrar, da iṣḍṣa s iwaliwn nns ula tawada nns. tarwa n iɣrm ḥmlnt kigan. adday d iggz g udrar azzln ẓaṛs afad ad asn yals i tmaynin d izlan nna ittirir, izlan inaḍftn nna d yugm sg tudrt nns d tmariwin ɣifs akkw ikkan.
Baqcic illa ɣurs yan uɣyul amllal, igwzzil awd ntta zun d bab nns. aɣyul n baqcic ur iḥṛic, ur ihrri, iṛṛẓa as yan umẓẓuɣ afasiy. adday t ini baqcic iggz d i udrar, ddag yannay uɣyul tuga ammas i ulmu tama n wasif da ikkat s tiqqar, igr d acwari ula lԑwin n baqcic s akal. ur d yat tikklt ula d snat ayd iskr imkinnaɣ allig d wanna t iẓṛan ar iḍṣṣa. lumaṛ timɣarin ula icirran itthḍaṛn tama n wasif.
tarwa n iɣrm imẓyann ula ixatarn ssnen baqcic is iga imṣḍṣi, ssnen is iga awd yan urgaz iwssirn da ittettu kigan, yan urgaz ur ikttin awd i ma ayd ittca i imnsi nns. iga bu ungim axatar, ur t thwwil tudrt ula ddunit ula iqaṛiḍn ula timlsa. ntta iga afgan iḥmln izlan d taḍṣa d tayri d iwaliwn izddign iḥlan.
Muḥa d Itri gan sin imddukkal, tsman tn tamẓiyt d lhḍṛt d tayri n yigran. yan wass g wussan n tfsut, nnan iqqan d ad nskr yat tmukrist i baqcic afad ad niẓiṛ nik is da ittettu midd ɣas tiḥllal ad ɣifs ttinin middn.
nkrn ԑaynen baqcic s umazir nns, lliɣ g tinn gulan inna as Muḥa :” azul a ԑmmi baqcic, awa ma ayd ak tga tudrt g umazir ad ? “
Irar as d :” azulat a ildjign n tfsut, ad digun isqsa lxir d mayd iṛwan, awa hat ngann afus xf uɣyul ar ittddu [1]ar aynna! tnna trgʷa usiɣ akuṛṛ, yini ukuṛṛ niɣ aman[2]! kcmat ad tsum atag n baqcic awssar? “
nenna as g yat tikklt: awa hat ur idd atag ayd aɣ d yiwin, ha nn ayt iɣrm ar ttinin tamɣart n baqcic yaɣ tt kra, tuḍn kigan. iwin tt ayt iɣrm s ṣṣbiṭaṛ[3] axatar n tɣrmt n imgunn, iwa nddu d dɣi ad niẓiṛ is d tuwi d inɣmisn, is iga wawal ad tilawt ??
inna asn, yawn! is ak tnnam! ddiɣ ad iẓiṛɣ ad annayɣ mayd illan?
inkr baqcic, ur iswangim, isburdu ahggwari[4] nns amllal bu umẓẓuɣ iṛẓan, yamẓ abrid, ar ittddu, iggz d adrar, ar yalla, ar ittini: tdda tmaɣart! tmmut tmɣart! awa ma ayd iran yad ad i issmra i kra n tiram? iwa ma ayd iran yad ad i ittaru kra n tarwa? iwa ma ayd iran ad i yad ittaws g umazir? iwa ma ayd innan ad iyi d ittrara awal ula izlan?
ddag da ittals i iwaliwn ad, kkan d warraw tiɣrdin nns ar ḍṣṣan allig da ḍḍaṛn s akal.
imikk ikti d baqcic is ur itahil akkw g tudrt nns, inna matta tmɣart xf allaɣ dɣi? matta nkkin? matta kwnni?
————————-
[1]ngann afus xf uɣyul ar itteddu :inzi d nugm g iwaliwn iqbuṛn n tmazirt n dads.da isnԑat middn nna mi idrus lhal.
[2]tnna trgwa usiɣ akuṛṛ, yini ukuṛṛ niɣ aman: inzi d nugm g tskla tamiwant n wasif n dads .
[3]nṣbiḍaṛ : Hopital .
[4]Ahggwari : aɣyul