ⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⴰⴳⵍⵍⵉⴷ ⵏ ⵍⵎⵖⵔⵉⴱ : ⴰⵙⵖⵜⵙ ⵏ ⵓⵙⴳⴳⵯⴰⵙ ⴰⵎⴰⵣⵉⵖ ⵜⴰⴼⵓⴳⵍⴰ ⵜⴰⵏⴰⵎⵓⵔⵜ ⴷ ⵜⴰⵏⵓⵕⵥⵎⵜ ⵜⴰⵎⴰⴷⴷⵓⴷⵜ
التجمع العالمي الأمازيغي يراسل الملك محمد السادس ورئيس الحكومة لترسيم السنة الأمازيغية
L’Assemblée Mondiale Amazighe demande au roi du Maroc et au président de gouvernement la reconnaissance du nouvel an amazigh
ⵉⵎⵔⵙⵉ: ⴰⵙⵖⵜⵙ ⵏ ⵓⵙⴳⴳⵯⴰⵙ ⴰⵎⴰⵣⵉⵖ ⵜⴰⴼⵓⴳⵍⴰ ⵜⴰⵏⴰⵎⵓⵔⵜ ⴷ ⵜⴰⵏⵓⵕⵥⵎⵜ ⵜⴰⵎⴰⴷⴷⵓⴷⵜ
ⴰⵣⵓⵍ ⵉⵥⵉⵍⵏ,
ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ,
ⵉⴳⴰ ⴰⵖ ⴰⴷⴷⵓⵔ ⴰⴷ ⵏⴰⵣⵏ ⵜⴰⴱⵔⵜ ⴰⴷ ⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉⴳⴰⵏ ⴰⵏⵙⵙⵉⵅⴼ ⵏ ⵓⵡⴰⵏⴽ ⴷ ⵜⵎⴰⵜⴰⵔⵜ ⵏ ⵜⴰⵎⵓⵏⵜ ⵏ ⵜⵎⵜⵜⵉ ⵍⵍⵉ ⵉⴹⵎⵏⵏ ⵜⴰⵙⵓⵍⵜ ⵏⵏⵙ ⴷ ⵓⵔⴳⴳⵉⴳ ⵏⵏⵙ, ⵉⴱⴷⴷⵏ ⴼ ⵓⵡⵇⵇⵔ ⵏ ⵜⵎⵏⴹⴰⵡⵜ ⵏ ⵜⴳⵍⴷⵉⵜ ⴷ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ.
ⵙⴳ ⵓⴳⴳⴰⵔ ⵏ ⵎⵔⴰⵡ ⵏ ⵉⵙⴳⴳⵯⴰⵙⵏ ⴰⴷ ⵏⵜⵜⴰⵣⵏ ⵉ ⵜⵏⴱⴰⴹⵜ ⵜⴰⵎⵣⵣⴳⴰⵔⵜ ⵏ ⵖⵉⵍⴰⴷ ⴷ ⵜⴰⴷ ⵉⵣⵔⵉⵏ, ⴷ ⵜⵏⴱⴰⴹⵜ ⵜⴰⵣⵔⴼⴰⵏⵜ ⵉⴳⴰⵏ ⴰⴱⵕⵍⴰⵎⴰⵏ ⵙ ⵙⵉⵏ ⵉⵙⵇⵇⵉⵎⵏ ⵏⵏⵙ, ⵃⵎⴰ ⴰⴷ ⵉⵍⵉⵏ ⵉⵣⵔⴼⴰⵏ ⵏ ⵓⵙⵉⵙⵙⵏ ⵏ ⵉⵅⴼ ⵏ ⵓⵙⴳⴳⵯⴰⵙ ⴰⵎⴰⵣⵉⵖ ⴷ ⵜⴰⴼⵓⴳⵍⴰ ⵜⴰⵏⴰⵎⵓⵔⵜ ⴷ ⵜⴰⵏⵓⵕⵥⵎⵜ ⵜⴰⵎⴰⴷⴷⵓⴷⵜ ⴰⵎ ⴽⵓ ⵜⵉⴼⵓⴳⵍⴰ ⴷ ⵜⵏⵓⵕⵥⵓⵎⵉⵏ, ⵎⴰⵛ ⵓⵔ ⵜⵍⵍⵉ ⴽⵔⴰ ⵏ ⵜⵎⵔⴰⵔⵓⵜ ⵜⵓⵎⵏⵉⴳⵜ ⴼ ⵜⵓⵜⵔⴰ ⴰⴷ ⵉⴳⴰⵏ ⵖⵉⵍⴰⴷ ⵜⵓⵜⵔⴰ ⵜⴰⵎⴷⵏⴰⵏⵜ ⵙ ⵇⵇⵍⵏ ⴽⵓ ⵉⵎⵙⴽⴰⵔⵏ ⵉⵎⴰⵣⵉⵖⵏ ⴷ ⵜⵎⴰⴷⴷⴰⵙⵉⵏ ⵜⵉⵣⵔⴼⴰⵏⵉⵏ ⴷ ⴽⵔⴰ ⵏ ⵉⴽⴰⴱⴰⵕⵏ ⵉⵙⵔⵜⴰⵏⵏ.
ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ,
ⵜⵙⴷⴷⵉⴷⵎ ⵓⴳⴳⴰⵔ ⵏ ⵜⴽⵍⵉⵜ ⴼ ⵉⵡⵉⵣ ⵏⵏⵓⵏ ⵉⴷⵓⵙⵏ ⴼ ⵓⵙⵖⵣⵏ ⵏ ⴽⵓ ⵜⵉⵔⵙⴰⵍ ⵏ ⵓⵎⵣⵔⵓⵢ ⴰⵎⴳⵔⵓ ⴷ ⵜⵎⴰⴳⵉⵜ ⵜⴰⴷⵍⵙⴰⵏⵜ ⵜⴰⵏⴰⵎⵓⵔⵜ ⵏ ⵍⵎⵖⵔⵉⴱ ⵖ ⵍⵍⴰⵏ ⵉⵙⴰⴼⴼⵏ ⵉⴷⵍⵙⴰⵏⵏ ⵉⵎⵢⴰⵏⴰⵡⵏ, ⵖⵎⴽ ⵍⵍⵉ ⴷ ⵢⵓⵛⴽⴰⵏ ⵖ ⵉⵏⴰⵡ ⵏⵏⵓⵏ ⴰⵎⴰⵜⵜⵓⵢ ⵏ 17 ⴽⵟⵓⴱⵕ 2001 ⵖ ⵉⵍⵍⴰ:”ⵉⴳⴰ ⵓⵙⵎⵖⵔ ⵏ ⵜⵎⴰⵣⵉⵖⵜ ⵜⴰⵎⴰⵙⴰⵢⵜ ⵜⴰⵏⴰⵎⵓⵔⵜ, ⴰⵛⴽⵓ ⵓⵔ ⵜⵓⴼⵉ ⴽⵔⴰ ⵏ ⵜⴷⵍⵙⴰ ⵜⴰⵏⴰⵎⵓⵔⵜ ⴰⴷ ⵜⵏⴰⴽⵕ ⵉⵥⵓⵕⴰⵏ ⵏⵏⵙ ⴳⴰⵏⵉⵏ ⵡⵉⵏ ⵓⵎⵣⵔⵓⵢ, ⵉⵇⵇⴰⵏ ⴷ ⴰⴷ ⵜⵏⵏⵓⵕⵥⵎ ⴷ ⴰⴷ ⵓⵔ ⵜⵇⵇⵏ ⴼ ⵉⵅⴼ ⵏⵏⵙ, ⵃⵎⴰ ⴰⴷ ⵜⵉⵍⵉ ⵜⵣⵣⵉⴳⵣⵜ ⵏⵏⵙ ⵉⴳⴰⵏ ⵜⴰⴼⴰⴷⴰ ⵏ ⵜⵉⵍⵉⵜ ⴷ ⵓⴱⵓⵖⵍⵓ ⵏ ⴽⵓ ⵜⴰⵖⵔⵎⴰ”.
ⵖⵎⴽ ⵍⵍⵉ ⵉⵙⴽⵔ ⵓⴷⵓⵙⵜⵓⵔ ⴰⵎⵖⵔⵉⴱⵉ ⵖ ⵜⴽⵛⵛⵓⵎⵜ ⵏⵏⵙ ⴷ ⵓⵎⴰⴳⵔⴰⴷ ⵡⵉⵙ ⵙⵎⵎⵓⵙ ⴷ ⵜⵓⵎⴰⵢⵉⵏ ⵏ ⵓⵣⵔⴼ ⴰⵎⴰⴷⴷⴰⵙ ⵓⵟⵟⵓⵏ 16.26 ⵉⵣⴷⵉⵏ ⴷ ⵜⴼⵔⴽⵉⵡⵉⵏ ⵏ ⵓⵙⵎⵀⵍ ⵏ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ, ⵙⴽⵔⵏ ⵖ ⵜⵎⴰⵣⵉⵖⵜ ⵜⵓⵜⵍⴰⵢⵜ ⴷ ⵜⴷⵍⵙⴰ ⴷ ⵜⵖⵔⵎⴰ ⴷ ⵜⵎⴰⴳⵉⵜ ⵢⴰⵏ ⵓⴼⵔⴷⵉⵙ ⵏ ⵜⵔⵙⴰⵍ ⵏ ⵜⵎⴰⵣⵉⵔⵜ ⵏⵏⵖ ⵉⵄⵣⵣⴰⵏ, ⵢⵓⵔⵔⵉ ⴷ ⵓⵙⵎⵖⵔ ⵉ ⵓⵡⵔⵉⴽ ⴰⵎⵖⵔⵉⴱⵉ, ⴰⵢⵍⵍⵉ ⵓⵔ ⵢⵓⵊⵊⵉⵏ ⴰⴷ ⵜⵉⵍⵉ ⵡⴰⵔⵜⵓⵙⵙⵏⴰ ⵏ ⵢⴰⵜ ⵜⵎⵙⴰⵔⵜ ⵏ ⵓⵎⵣⵔⵓⵢ ⵉⴳⴰⵏ ⵜⴰⵅⴰⵜⴰⵔⵜ ⵖⵔ ⵓⵡⵔⵉⴽ ⴰⵎⵖⵔⵉⴱⵉ ⴷ ⵜⵣⴷⴰⵢⵜ ⵏⵏⵙ ⴷ ⵉⵥⵓⵕⴰⵏ ⵏ ⵓⵎⵣⵔⵓⵢ ⴷ ⵜⵊⵓⵖⵔⴰⴼⵉⵜ ⵏ ⵜⵎⴰⵣⵉⵔⵜ ⵏⵏⵖ.
ⴼ ⵎⴰ ⴰⵏⵏ, ⵏⵙⵓⵜⵓⵔⵖ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵢⵉⵍⵉ ⵢⴰⵏ ⵓⴹⴰⵀⵉⵕ ⴰⵛⴰⵔⵉⴼⴼ ⵓⵙⵖⵜⵙⵏ ⵉⵅⴼ ⵏ ⵓⵙⴳⴳⵯⴰⵙ ⴰⵎⴰⵣⵉⵖ ⴷ ⵜⴰⴼⵓⴳⵍⴰ ⵜⴰⵏⴰⵎⵓⵔⵜ ⴷ ⵜⵏⵓⵕⵥⵎⵜ ⵜⴰⵎⴰⴷⴷⵓⴷⵜ ⴰⵎ ⴽⵓ ⵜⵉⴼⵓⴳⵍⴰ ⴷ ⵜⵏⵓⵕⵥⵓⵎⵉⵏ ⵜⵉⵎⴰⴷⴷⵓⴷⵉⵏ, ⵙ ⵓⵎⵙⴰⵙⴰ ⴷ ⵉⵎⴰⵏ ⴷ ⵜⴼⵍⵙⴰⴼⵜ ⵏ ⵜⵎⵏⴹⴰⵡⵜ ⴷ ⵉⵏⴰⵡⵏ ⵏⵏⵓⵏ ⵉⵎⴰⵜⵜⵓⵢⵏ.
ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ,
ⵖ ⵜⴳⵉⵔⴰ, ⵉⴳⴰ ⵉⵢⵉ ⴰⴷⴷⵓⵔ ⴰⴷ ⴰⵣⵏⵖ ⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉⵙⵔⵖⵓⴷⵏ ⴷ ⵉⵙⵓⵜⵓⵔⵏ ⵥⵉⵍⵏⵉⵏ ⵙ ⵜⵎⵍⴷⴰ ⵏ ⵓⵙⴳⴳⵯⴰⵙ ⴰⵎⵉⵍⴰⴷⵉ 2022 ⴷ ⵓⵙⴳⴳⵯⴰⵙ ⴰⵎⴰⵣⵉⵖ 2972, ⵙⵉⵜⵉⵎⵖ ⴰⵡⵏ ⵜⴰⴷⵓⵙⵉ.
ⵕⴰⵛⵉⴷ ⵕⴰⵅⴰ
ⴰⵎⵖⴰⵔ n ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ