ⵓⴽⵜⵜⵓⵢ ⵡⵉⵙ 21 ⵏ ⵜⵓⵙⵏⵜ ⵜⴰⵎⴰⴷⴷⵓⴷⵜ ⵙ ⵓⵙⴽⴽⵉⵍ ⵏ ⵜⴼⵉⵏⴰⵖ
ⵉⵡⴰⵜⵜⵙ ⵓⵏⵎⵓⵇⵇⴰⵔ ⴰⴷ, ⵏⵏⴰ ⵉⵜⵜⵓⵙⵏⵎⴰⵍⴰⵏ ⴷⴷⵓ ⵜⵎⴰⵜⴰⵔⵜ » ⴰⵙⴽⴽⵉⵍ ⵏ ⵜⴼⵉⵏⴰⵖ ⴳ ⵜⵉⵏⵎⵍ ⵜⴰⵎⵖⵔⵉⴱⵉⵜ ⴷ ⵓⵙⵢⵔⴰⵔ ⴰⴳⴷⵓⴷⴰⵏ: ⵙⴳ ⵓⵙⵙⵕⵚⵓ ⵙ ⵓⵙⵜⴰⵍ » ⴷⵔⴰⵏ ⴳⵉⵙ ⵉⵎⵥⵍⴰⵢⵏ ⴳ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵜⴱⵉⴷⴰⴳⵓⵊⵉⵜ ⵏ ⵓⵙⵍⵎⴷ ⵏⵏⵙ, ⴰⴱⴷⴷⵉ ⵅⴼ ⵓⵙⵡⵉⵔ ⵏ ⵜⵉⵍⵉⵜ ⴷ ⵓⵙⵙⵕⵚⵓ ⵏ ⵓⵙⴽⴽⵉⵍ ⴰⴷ ⴳ ⵜⵉⵏⵎⵍ ⵜⴰⵎⵖⵔⵉⴱⵉⵜ ⴷ ⴳ ⵓⵙⵢⵔⴰⵔ ⴰⴳⴷⵓⴷⴰⵏ.
ⵙ ⵓⵣⵎⵣⵣⵓ ⴰⴷ, ⵉⵏⵏⴰ ⵄⴱⴷⵍⵍⴰⵀ ⴱⵓⵣⵏⴷⴰⴳ, ⴰⵎⵔⵣⵓ ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⴳ ⵢⴰⵏ ⵓⴼⵙⵔ ⴷⴷⵓ ⵜⵎⴰⵜⴰⵔⵜ » ⴰⵙⵜⴰⵍ ⵏ ⵜⴰⵏⵏⴰⵍⵉⵏ ⵜⵉⴱⵉⴷⴰⴳⵓⵊⵉⵢⵉⵏ ⵉⵜⵜⵢⴰⵔⴰⵏ ⵙ ⵓⵙⴽⴽⵉⵍ ⵏ ⵜⴼⵉⵏⴰⵖ: ⵜⴰⵢⴰⴼⵓⵜ ⴷ ⵜⵎⵥⵍⴰⵢ », ⴰⵎⵎⴰⵙ ⵏ ⵓⵔⵣⵣⵓ ⴰⴷⵉⴷⴰⴽⵜⵉⴽⵉ ⴷ ⵉⵖⴰⵡⴰⵙⵏ ⵉⴱⵉⴷⴰⴳⵓⵊⵉⵢⵏ ⵉⴹⴼⵕⵏ ⵉ ⵓⵙⵉⵏⴰⴳ ⵉⵙⵙⴼⵓⵖ ⴷ ⵜⵓⴳⵜⵜ ⵏ ⵜⵥⵕⵉⴳⵉⵏ ⵜⵉⵏⴼⵓⵍⵉⵏ ⴷ ⵜⵎⵓⵟⵟⵓⵏⵉⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵙ ⵓⵙⴽⴽⵉⵍ ⵏⵏⵙ ⵏ ⵜⴼⵉⵏⴰⵖ ».
ⵉⵙⵙⵉⵙⴼⵉⵡ ⵎⴰⵙⵙ ⴱⵓⵣⵏⴷⴰⴳ ⴳ ⵓⵎⵏⴰⴷ ⴰⴷ, ⵎⴰⵙ ⵜⵜⵓⵙⴽⴰⵔⵏ ⵉⴷⵍⵉⵙⵏ ⵉⵏⵎⵍⴰⵏⵏ ⵉⵃⵢⵢⵍ ⵜⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵙ ⵜⵡⵉⵙⵉ ⵏ ⵜⵎⴰⵡⴰⵙⵜ ⵉⵜⵜⵓⵙⵖⵍⴰⴼⵏ ⵙ ⵢⵉⴳⵔ ⵙ ⵎⴰⴷ ⵉⵥⵍⵉⵏ ⵙ ⵓⵙⵡⵉⵔ ⴰⵎⵏⵣⵓ, ⴷ ⵜⵏⴼⵓⵙⵉⵏ ⵉⵜⵜⵓⵙⵡⵍⴰⴼⵏ, ⴷ ⵜⵣⵍⴰⵜⵉⵏ ⵙ ⵜⴼⵉⵏⴰⵖ (ⴽⴽⵓⵥ ⵉⴷⵍⵉⵙⵏ) ⴷ ⵉⵎⴰⵡⴰⵍⵏ ⵣⵓⵏ ⴷ ⴰⵎⴰⵡⴰⵍ ⴰⵏⵎⵍⴰⵏ ⴷ ⵜⵙⴷⵍⵉⵙⵉⵏ ⴷ ⵜⴰⵏⵏⴰⵍⵉⵏ ⵜⵉⵍⵉⴽⵟⵕⵓⵏⵉⵢⵉⵏ ⴷ ⵜⵉⵢⵢⴰⴹ, ⵉⵙⵙⵎⵜⵔ ⵎⴰⵙ ⴷ ⵜⵉⵏⴼⵓⵙⵉⵏ ⵉⵜⵜⵓⵙⵡⵍⴰⴼⵏ ⵡⴰⵜⵜⵙⵏⵜ ⵜⴰⵍⵙⴰⵔⵉⵜ ⵏ ⵡⴰⵢⴷⴰ ⴰⵎⵉⵡⴰⵏ ⴰⵎⴰⵣⵉⵖ, ⴷ ⵓⵍⴰ ⵜⵉⵏⴼⵓⵙⵉⵏ ⴷ ⵉⵙⵡⴰⵏ ⴳ ⵡⴰⵢⴷⴰ, ⴷ ⵓⵍⴰ ⵜⵉⵍⵍⵉ ⵙⵏⴼⵍⵓⵍⵏ ⵉⵏⵔⵣⵓⵜⵏ ⵙⴳ ⵓⵙⵉⵏⴰⴳ ⴷ ⴱⵕⵕⴰ ⵏⵏⵙ.
ⴹⴰⵕⵜ ⵎⴰⴷ ⵉⵙⵖⴹⴼ ⵎⴰⵙ ⴷ ⴰⵙⵉⵏⴰⴳ ⵉⵙⵙⴼⴰⵖ ⴷ ⵜⵓⴳⵜⵜ ⵏ ⵜⴰⵏⵏⴰⵍⵉⵏ ⵜⵉⵍⵉⴽⵟⵕⵓⵏⵉⵢⵉⵏ ⴷ ⵜⵇⴰⵕⵉⴹⵉⵏ ⵜⵓⴷⴷⵉⵣⵉⵏ ⵉⵥⵍⵉⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵉ ⵡⴰⵣⵣⴰⵏ, ⵉⵖⵔⴰ ⵙ ⵓⵙⴽⴰⵔ ⵏ ⵜⵣⵔⴰⵡⵉⵏ ⵏ ⵜⴹⴼⵕⵉ ⴷ ⵓⵙⵜⴰⵍ ⵏ ⵓⵙⵙⵎⵔⵙ ⵏ ⵉⵙⴳⴳⵓⵔⵏ ⴰⴷ ⴷ ⵜⴰⵏⵏⴰⵍⵉⵏ ⴷ ⵓⵙⵡⵉⵔ ⵏ ⵓⵙⵙⴱⵖⵔ ⴳⵉⵙⵏⵜ.
ⴳ ⵜⵙⴳⴰ ⵏⵏⵙ, ⵉⵙⴼⵙⵔ ⵎⵚⵟⴰⴼⴰ ⵚⵚⵖⵉⵕ, ⴰⵎⵔⵣⵓ ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⴳ ⵢⴰⵜ ⵜⴽⵛⵛⵓⵎⵜ ⵅⴼ » ⵓⵙⵜⴰⵍ ⵏ ⵓⵙⵡⵉⵔ ⵏ ⵡⵓⴹⵓⴼ ⵏ ⵉⵏⵍⵎⴰⴷⵏ ⵙⴳ ⵜⵖⵔⵉ ⴷ ⵜⵉⵔⵔⴰ ⴳ ⵜⵎⴰⵣⵉⵖⵜ ⵙ ⵓⵙⵙⵎⵔⵙ ⵏ ⵓⵙⴽⴽⵉⵍ ⵏ ⵜⴼⵉⵏⴰⵖ », ⵜⴰⵣⵔⴰⵡⵜ ⵏⵏⴰ ⵉⵙⴽⵔ ⵓⵙⵉⵏⴰⴳ ⴹⴰⵕⵜ ⵏ ⵙⴰ ⵏ ⵉⵙⴳⴳⵯⴰⵙⵏ ⵙⴳ ⵓⵙⵉⴷⴼ ⵏ ⵜⵎⴰⵣⵉⵖⵜ ⴷ ⵓⵙⵍⵎⴷ ⵏⵏⵙ ⴳ ⵜⴼⵔⴽⵉⵡⵉⵏ ⵏ ⵓⵙⵍⵎⴷ ⴰⵎⵏⵣⵓ ⵙ ⵓⵙⵙⵎⵔⵙ ⵏ ⵓⵙⴽⴽⵉⵍ ⵏ ⵜⴼⵉⵏⴰⵖ, ⴰⴼⴰⴷ ⴰⴷ ⵢⵉⵍⵉ ⵓⵙⵜⴰⵍ ⵏ ⵜⵉⵔⵎⵉⵜ ⴰⴷ.
ⵉⴱⴷⵔ ⵎⴰⵙ ⴷ ⵜⴰⵣⵔⴰⵡⵜ ⴰⴷ ⵜⵙⵡⵓⵜⵜⴰ ⴰⴽⴰⵣ ⵏ ⵜⵙⴽⵯⴼⵍⵜ ⵏ ⵡⵓⴹⵓⴼ ⵏ ⵉⵏⵍⵎⴰⴷⵏ ⵙⴳ ⵜⵖⵔⵉ ⴷ ⵜⵉⵔⵔⴰ ⵙ ⵓⵙⵙⵎⵔⵙ ⵏ ⵓⵙⴽⴽⵉⵍ ⵏ ⵜⴼⵉⵏⴰⵖ ⵙ ⵓⵙⵏⴰⵍ ⵙ ⵉⵙⵓⴳⴰⵎ ⵉⵡⵙⵙⴰⵏ ⴷ ⵉⴼⵓⴽⵙⴰⵏⵏ ⴷ ⵜⵙⵓⴳⴰⵔ ⵜⵜⴰⵡⵥⵍⴰⵢⵏⵉⵏ ⴳ ⵉⵖⴰⵡⴰⵙⵏ ⵥⵍⵉⵏⵉⵏ ⵙ ⵓⵙⵡⵉⵔ ⵡⵉⵙ ⵙⵉⵏ ⵙⴳ ⵓⵙⵍⵎⴷ ⴰⵎⵏⵣⵓ.
ⵎⴽⵍⵍⵉ ⵜⵙⵡⵓⵜⵜⴰ ⵜⵣⵔⴰⵡⵜ, ⵉⵙⵎⴷ ⵓⵎⵔⵣⵓ, ⵉⵏⵍⵎⴰⴷⵏ ⴷ ⵜⵏⵍⵎⴰⴷⵉⵏ ⵏ ⵜⴳⵉⵔⴰ ⵏ ⵓⵙⴳⴳⵯⴰⵙ ⵡⵉⵙ ⵙⵉⵏ ⵙⴳ ⵓⴷⵍⵎⴷ ⴰⵎⵏⵣⵓ ⵢⵉⵡⴹ ⵓⵟⵟⵓⵏ ⵏⵏⵙⵏ 1100 ⵏ ⵓⵏⵍⵎⴰⴷ ⴷ ⵜⵏⵍⵎⴰⴷⵜ ⴳ ⵡⴰⵎⵎⴰⵙⵏ ⵉⵖⵔⵎⴰⵏⵏ ⴷ ⵉⴼⴰⵔⴰⵏⵏ ⴷ ⵣⵓⵏ ⴷ ⴰⵖⵔⵎⴰⵏ ⴷ ⵡⵉⴷ ⵙⴰⵡⴰⵍⵏⵉⵏ ⵓⵍⴰ ⵡⵉⴷ ⵓⵔ ⵙⴰⵡⵍⵏⵉⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵏⵏⴰ ⵎⵉ ⵉⵜⵜⵓⴼⴽⴰ ⵓⵡⵜⵜⵓ ⴰⵏⴰⴷⴷⴰ ⵙⴳ ⵜⴼⴰⴷⵉⵡⵉⵏ ⵏ ⵓⵍⵎⵎⵓⴷ ⵏ ⵜⵎⴰⵣⵉⵖⵜ.
ⵉⵙⵙⵎⵜⵔ ⵎⴰⵙ ⴷ ⵜⴰⵣⵔⴰⵡⵜ ⵜⴼⴼⵖ ⵙ ⵎⴰⵙ ⴷ ⴰⵍⵎⵎⵓⴷ ⵏ ⵜⵖⵔⵉ ⴷ ⵜⵉⵔⵔⴰ ⴳ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙ ⵓⵙⵙⵎⵔⵙ ⵏ ⵓⵙⴽⴽⵉⵍ ⵏ ⵜⴼⵉⵏⴰⵖ ⵓⵔ ⴰⵔ ⵉⵙⴽⴰⵔ ⴰⵡⴷ ⴽⵔⴰ ⵏ ⵜⵏⵎⴰⵔⵜ ⵜⴰⴱⵉⴷⴰⴳⵓⵊⵉⵜ ⵙⵍⴰⵡⴰⵏ ⴰⴽⴽⵯ ⵉ ⵉⵏⵍⵎⴰⴷⵏ ⵏ ⵓⵙⵡⵉⵔ ⵡⵉⵙ ⵙⵉⵏ ⵙⴳ ⵓⵙⵍⵎⴷ ⴰⵎⵏⵣⵓ.
ⵙⴳ ⵜⵙⴳⴰ ⵏⵏⵙ, ⵉⵙⵙⵉⵙⴼⵉⵡ ⵍⵃⵓⵙⴰⵢⵏ ⴰⵎⵓⵥⴰⵢ, ⴰⵎⵔⵣⵓ ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⴳ ⵢⴰⵏ ⵓⴼⵙⵔ ⵅⴼ » ⵜⴼⵉⵏⴰⵖ ⴳ ⵓⵙⴰⵢⵔⴰⵔ ⴰⴳⴷⵓⴷⴰⵏ: ⵙⴳ ⵜⴷⵓⴳⴰⵎⵜ ⵙ ⵜⵙⵖⵏⴰⵏⵜ » ⵎⴰⵙ ⴷ ⴰⵙⵉⴷⴼ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷⴰ ⵜ ⵉⵙⵙⵓⵜⵓⵢ ⵓⵖⴰⵡⴰⵙ ⵓⵏⴱⵉⴹ 2021-2026 ⴷ ⵏⵏⴰ ⵉⴼⵔⵔⵓⵏ ⵜⵓⴳⵜⵜ ⵏ ⵜⵎⴳⴳⵉⵢⵉⵏ ⵏ ⵓⵙⵉⴷⴼ ⵏ ⵜⵎⴰⵣⵉⵖⵜ, ⵓⵍⴰ ⴰⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 26-16 ⵉⵣⴷⵉⵏ ⵙ ⵓⵙⵡⵓⵜⵜⵓ ⵏ ⵜⴼⵔⴽⵉⵡⵉⵏ ⵏ ⵓⵙⵎⵀⵍ ⵏ ⵓⴷⵔⵉⵣ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ, ⴷ ⵜⵎⴰⵎⴽⵉⵏ ⵏ ⵓⵙⵉⴷⴼ ⵏⵏⵙ ⴳ ⵢⵉⴳⵔ ⵏ ⵓⵙⵍⵎⴷ ⴷ ⵢⵉⴳⵔⴰⵏ ⵏ ⵜⵓⴷⵔⵜ ⵜⴰⵎⴰⵜⴰⵢⵜ ⵖⵓⵔ ⴰⵙⵉⵣⵡⵔ, ⵓⵍⴰ ⴷ ⵓⴷⵓⵙⵜⵓⵔ ⵏ ⵜⴳⵍⴷⵉⵜ.
ⵉⵜⵜⵓⵣⵎⵎⴰⵎ, ⴳ ⵓⵙⴰⵜⵉ ⴰⴷ, ⵎⴰⵙ ⵉⵍⵍⴰ ⵓⵙⵉⴷⴼ ⵏ ⵜⵎⴰⵣⵉⵖⵜ ⴳ ⵜⵓⴳⵜⵜ ⵏ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⴷ ⵓⵍⴰ ⴳ ⵉⴼⵉⵍⵏ ⵏ ⵓⵙⵡⴰⵍⴰ ⴷ ⵓⵙⵏⵓⴱⴳ ⵏ ⵉⵔⵣⴰⴼⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵎⵙⵙⵓⴳⴰⵔ ⵜⵉⴳⴷⵓⴷⴰⵏⵉⵏ, ⴷ ⵜⴻⵜⵜⵓⵙⴽⴰⵔⵏⵜ ⵢⴰⵜ ⵜⴳⵔⵓⵎⵎⴰ ⵏ ⵜⵎⴳⴳⵉⵢⵉⵏ ⵢⴰⴹⵏ, ⵉⵙⵙⵉⵙⴼⵉⵡ ⵎⴰⵙ ⴷ ⵜⵉⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⵎⵎⴰⵖⵏⵜ ⵅⴼ ⵓⵙⵉⴷⴼ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.
ⵉⵥⵍⵉ ⵓⵏⵎⵓⵇⵇⴰⵔ ⴰⴷ ⵙ ⵜⵉⵍⵉⵜ ⵏ ⵓⵏⴱⴷⴰⴷ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵃⵎⴰⴷ ⴱⵓⴽⵓⵙ, ⴷ ⵓⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵉⵏⴰⴳ, ⵍⵃⵓⵙⴰⵢⵏ ⵍⵎⵓⵊⴰⵀⵉⴷ, ⴷ ⵜⴳⵔⵓⵎⵎⴰ ⵏ ⵉⵎⵔⵣⵓⵜⵏ ⴷ ⵉⵎⵏⵜⴰⵢⵏ ⵙ ⵓⵙⴽⴽⵉⵏ ⴰⴷⵍⵙⴰⵏ ⴰⵎⴰⵣⵉⵖ.
ⴰⵙⵓⵖⵍ: ⵄⴱⴷⵍⵡⴰⵃⴷ ⴱⵓⵜⴱⴰⵖ.