“ⴽⵓⴱ-26: ⵉⵖⵕⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜⵉⵍⵉ ⵜⵉⵔⴰⵜ ⵜⴰⵙⵔⵜⴰⵏⵜ ⵜⵉⵍⴰⵡⵜ ⵉⵄⴷⵍⵏ ⵉ ⴰⴽⴽⵯ ⵜⵏⴼⴳⴰⵏⵜ ⴷⴰⵜ ⵜⵍⴽⴰⵎⵉⵏ ⵏ ⵓⵏⵎⴰⵍⴰ ⴰⵎⴰⴹⵍⴰⵏ ⵓⵔ ⴰⵢⵜ ⵉⴼⴰⵍⴽⵉⵏ

ⵉⵙⵓⵍ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ ⴳ ⵢⴰⵏ ⵉⵏⴰⵡ ⵍⵍⵉ ⵢⵖⵕⴰ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ, ⴰⵙ ⵏ ⵓⵢⵏⴰⵙ ⴳ ⴳⵍⴰⵙⴳⵓ (ⵚⴽⵓⵟⵍⴰⵏⴹⴰ) ⵍⵍⵉ ⵢⵙⵏⵓⴱⴳⵏ “ⴽⵓⴱ-26” (ⵙⴳ 01 ⴰⵔ 12 ⵏⵓⵡⴰⵏⴱⵉⵔ), ⵎⴰⵙ ⵓⵙⴷⵓⵙ ⵏ ⵉⵔⴰⵔⵏ ⵏ ⵓⵙⴷⵉⴷⴷⵉⵢ ⵏ ⵓⴱⴰⵢⵢⵓⵕ “ⴽⵓⴼⵉⴷ-19” ⵉⵎⵍⴰ ⵎⴰⵙ ⵓⴳⵔⴰⵡ ⴰⵎⴰⴹⵍⴰⵏ ⵖⵓⵔⵙ ⵜⵥⵉⴹⵕⴰ ⵏ ⵜⵉⵍⴰⵡⵜ, ⵎⴰⵢⴰⴷ ⵉⵎⵍⴰⵏ ⵎⴰⵙ ⵓⵔ ⵉⵍⵍⵉ ⴳ ⵓⵎⴷⵢⴰ ⵏ ⵓⵙⴱⵉⴷⴷ ⵏ ⵉⵙⵏⴼⴰⵍⵏ ⵏ ⵓⵏⵣⵡⵉ.

ⵎⵏⵏⴰⵡ ⵏ ⵉⵡⴰⵏⴽⵏ ⵖⵓⵔⵙⵏ ⵜⵎⵙⵙⵓⴳⵔⵜ ⵜⴰⵎⵣⵢⵓⵔⵜ ⴷ ⵜⵡⴰⵏⴳⵎⵉⵜ ⵏ ⵡⴰⴷⴷⴰⴷ ⵉⵅⵛⵛⵏ ⵏ ⵓⵡⵏⴰⴹ ⵎⵓⵔⵙⵏ ⴳ ⵓⵙⴰⵜⵉ ⵏ ⵜⵙⵙⴰⵙⵜ ⵜⴰⴷⵓⵙⴰⵏⵜ ⴰⴷ ⵎⵓⵙⵙⵓⵏ ⵉⵙⴰⴳⵓⵎⵏ ⵉⵣⵔⵉⵣⵏ ⵉⵎⵇⵕⴰⵏ, ⵎⴰ ⵢⴰⴷ ⵙⵓⵍ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⵉⴼⵔⴰ ⵢⵏⵏⴰ ⵎⴰⵙ ⵓⵎⵓⵙⵙⵓ ⵉⵎⵍⴰ ⴰⴳⴳⵯⴰⵣ ⵏ ⵉⵎⵓⵙⵙⵓⵏ ⵉⵅⵛⵛⵏ ⵅⴼ ⵓⵏⵣⵡⵉ.

ⵉⵙⵙⴽⵜⵉ ⵙⵓⵍ ⵜⵓⵙⵓⵔⵉⵏ ⵉⵅⵛⵛⵏ ⵍⵍⵉ ⴷ ⵉⵡⵉⵏ ⵉⵙⵏⵍⴼⵏ ⵉⵏⵣⵡⵉⵏ ⵉ ⵡⵎⵏⵣⴰⵡ ⴰⴼⵔⵉⵇⵉ, ⵉⵔⵏⴰ ⵢⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⴰⵙ ⴰⵥⵕⴼ ⵉⴷⵔⵓⵙⵏ ⴷ ⵓⵏⵏⴰⵍ ⵏ ⵜⴰⵜⵉⴽⵏⵓⵍⵓⵊⵉⵜ ⵉⵜⵜⵢⴰⴽⴽⴰⵏ ⵉ ⵉⴼⵔⵉⵇⵢⴰ ⵎⵍⴰⵏ ⴳ ⵢⴰⵜ ⵜⵡⵍⴰⴼⵜ ⵜⵉⴼⴰⵡⵜ ⵎⴰⵙ ⵓⵔ ⵉⵎⵓⵔⵙ ⵓⵏⴳⵔⴰⵡ ⴰⵎⴰⴹⵍⴰⵏ ⵉⵍⵍⴰⵏ.

ⴱⵍⴰ ⵏ ⵖⵉⴽⴰⵏⵏ, ⵉⵎⵍⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⵙⵉⵜⵎ ⵏⵏⵙ ⴰⴷ ⵉⵥⵕ ⵜⵡⴰⵍⴰ ⵢⴰⴷ ⵏ “ⴽⵓⴱ-26” ⴰⴷ ⵜⵏⴽⵔ, ⴳ ⵓⵙⵡⵉⵔ ⴰⴳⵔⴰⵖⵍⴰⵏ, ⵙ “ⵢⴰⵜ ⵜⵉⵖⵉⵙⵜ ⵜⴰⴳⵔⵓⵜ ⵍⵍⵉ ⵢⵕⵥⵎⵏ ⴰⵖⴰⵔⴰⵙ ⵉ ⵢⴰⵏ ⵓⵏⴰⵎⵓⵏ ⴰⵏⴼⴳⴰⵏ ⴰⵏⴱⴷⴰⵏ ⴷ ⵓⵏⵎⵢⴰⵍⴰⵍ ⴷ ⵉⴳⴰⵏ ⵉ ⵢⵏⵎⵣⴰⵢⵏ ⵏ ⵜⵣⵔⴼⵜ ⴷ ⵓⵙⵓⵎⵓ ⵓⵍⴰ ⵉⵜⵉⴳⵏ ⵏ ⵜⵓⴷⵔⵜ ⵉⵛⵛⴰⵔⵏ”.

ⴼ ⵖⵉⴽⴰⵏⵏ, ⵉⵙⵙⵖⵍⵉ ⵍⵎⵖⵔⵉⴱ ⴰⵙⵓⵖⵏ ⵏⵏⵙ ⵅⴼ ⵜⵖⴰⵡⵙⵉⵡⵉⵏ ⵏ ⵓⵏⵣⵡⵉ, ⴰⴼ ⴰⴷ ⵉⵙⴳⴳⵓⵣ ⵜⵉⵙⵢⴰⴼⵓⵜⵉⵏ ⵏⵏⵙ ⵏ ⵍⴳⴰⵣ ⵉⵃⵎⴰⵏ ⵙ 45,5% ⵙⴳ ⵖⵉⵍ ⴰⴷ 2030, ⵎⴰ ⵢⴰⴷ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.

ⵉⵏⵏⴰ ⵙⵓⵍ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⴰⵙ ⵓⵡⵜⵜⴰⵙ ⴰⴷ ⵉⴽⵛⵎ ⴳ ⵓⵙⴰⵜⵉ ⵏ ⵢⴰⵜ ⵜⵙⵜⵕⴰⵜⵉⵊⵉⵜ ⵏ ⵜⴳⵎⵉ ⵉⵔⴰⵏ ⴰⴷ ⵜⵙⵙⵓⴳⵣ ⵍⴽⴰⵕⴱⵓⵏ ⴷⴰⵜ ⵏ 2050, ⴷ ⴰⴷ ⵜⵣⵔⵉ ⵙ ⵢⴰⵜ ⵜⴷⵎⵙⴰ ⵉⵣⴳⵣⴰⵡⵏ ⵍⵍⵉ ⵢⵎⴰⵏⵏ ⴷ ⵉⵡⵜⵜⴰⵙⵏ ⵏ ⵜⵙⵓⵍⴰⵏⵜ ⴷ ⵓⵙⴷⵓⵙ ⵏ ⵜⵏⵣⴱⴰⵢⵜ ⴷ ⵜⵎⵢⴰⵔⵜ ⴷ ⵓⴼⵔⴰⴳ ⵏ ⵓⵏⵡⴰⴹ, ⵍⵍⵉ ⴼⵍⵍⴰⵜ ⴰⴼ ⵉⴱⵉⴷⴷ ⵓⵏⴰⵡ ⴰⵎⴰⵢⵏⵓ ⵏ ⵜⴳⵎⵉ ⵏ ⵜⴳⵍⴷⵉⵜ.

ⵉⵎⴰⵏ ⵍⵎⵖⵔⵉⴱ ⴷ ⵜⵎⵉⵣⴰⵔ ⵜⵉⴼⵔⵉⵇⵉⵢⵏ ⴳ ⵓⵍⵜⴰⵖ ⵏⵏⵙ ⴷⴰⵜ ⵏ ⵜⵓⴳⴳⴰⵣ ⵏ ⵓⵙⴱⵉⴷⴷ ⵏ ⵜⵓⵙⵓⵔⵉⵏ ⵉⵅⵛⵏⵏ ⵏ ⵉⵙⵏⴼⵍⵏ ⵏ ⵓⵏⵣⵡⵉ, ⵙⵡⴰ ⵙ ⵜⵙⵏⵜⴰⵢⵉⵏ ⵍⵍⵉ ⵢⵕⵥⵎ ⴳ ⵉⴳⵔ ⵏ ⵜⴽⵙⵙⵓⵢⵜ ⵏ ⵜⵏⴼⵍⴰⵃⵜ, ⵏⵖⴷ ⵜⴰⵏⴼⵔⵓⵜ, ⵏⵖⴷ ⴰⵔⴳⴳⵉⴳ, ⵏⵖⴷ ⵜⵍⴽⴰⵎⵜ ⵙ ⵜⵥⴹⴰⵕⵜ ⵜⴰⵙⵓⵍⴰⵏⵜ, ⵙ ⵜⵡⵡⵓⵔⵉ ⵏ ⴽⵕⴰⴹ ⵏ ⵜⵙⵇⵇⵉⵎⵉⵏ ⵜⵉⴼⵔⵉⵇⵉⵢⵏ ⵏ ⵓⵏⵣⵡⵉ, ⵢⵓⵛⴽⴰⵏ ⵙⴳ “ⵜⵇⵉⵛⵛⵉⵜ ⵜⵉⴼⵔⵉⵇⵉⵜ ⵏ ⵜⴳⴰⵡⵜ”, ⵉⵜⵜⵓⵙⴽⴰⵔⵏ ⴳ ⵏⵓⵡⴰⵏⴱⵉⵔ 2016 ⴳ ⵎⵕⵕⴰⴽⵯⵛ, ⵎⴰ ⵢⴰⴷ ⵙⵓⵍ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ.