ⴰⵙⴼⵙⵔ ⴰⵔ ⵉⵙⴼⵓⴳⵍⵓ ⴳ ⵎⴰⴷⵔⵉⴷ ⵙ ⵜⴰⵢⵙⵉ ⵏ ⵜⴽⴹⵉⴼⵜ ⵜⴰⵎⴰⵣⵉⵖⵜ

ⵉⵣⵣⵔⵉ ⵓⵙⵖⵙⵔ ⴰⴷ, ⵍⵍⵉ ⵜⵙⵏⵎⴰⵍⴰ ⵜⵎⵙⵇⴰⴷⵜ ⵏ ⵍⵎⵖⵔⵉⴱ ⴳ ⵙⴱⵍⵢⵓⵏ, ⴷ ⵓⵙⴰⴽⵯⵍ ⴰⴳⵍⴷⴰⵏ ⵏ ⵓⵥⵟⵟⴰ, ⴷ ⵜⵙⴰⵡⵔⵜ “ⵜⴰⵍⴰⵙⵉⵏ”, ⵍⵍⵉ ⵉⴳⴰⵏ ⵜⴰⵎⵢⴰⵡⴰⵙⵜ ⵏ ⵜⵡⵜⵎⵉⵏ ⵜⵉⵎⴰⵣⵉⵖⵉⵏ ⵍⵍⵉ ⵉⵙⴽⴰⵔⵏ ⵜⵉⴽⴹⵉⴼⵉⵏ ⵜⵉⵎⵖⵔⴰⴱⵢⵉⵏ, ⵜⵓⵛⴽⵉⵏⵜ ⵉⵜⵜⵓⵙⵜⴰⵢⵏ ⵣⴳ ⵜⴽⴹⵉⴼⵉⵏ ⵍⵍⵉ ⵙⴽⵔⵏⵜ ⴽⵔⴰ ⵏ ⵜⵡⵜⵎⵉⵏ ⵉⵙⴽⴰⵔⵏ ⵎⴰⵢⴰⵏ ⵙ ⵢⴰⵜ ⵜⵖⴰⵔⴰⵙⵜ ⵉⴼⵓⵍⴽⵉⵏ.

ⴰⵡⵜⵜⴰⵙ ⵏ ⵜⵎⵙⵉⵔⵜ ⴰⴷ, ⵍⵍⵉ ⵜⵙⴽⵔ ⵜⵀⵉⵏⴷⵉⵜ ⵉⵜⵜⵓⵢⵙⵙⴰⵏⵏ, ⴽⴰⴼⵉⵜⴰ ⴱⴰⵎⴰⵔ، ⴰⴷ ⵜⵙⵙⵓⵎⴰⵏ ⵜⴰⵢⵙⵉ ⵜⴰⵎⵖⵔⵉⴱⵉⵜ ⵜⴰⵇⴱⵓⵔⵜ ⵙ ⵓⵥⵟⵟⴰ ⴰⵎⴰⵣⵉⵖ ⴷ ⵉⴽⵯⵍⴰⵏ ⵉⵎⵎⴰⵍⵏ ⵜⴰⴷⵍⵙⴰ ⵜⴰⵎⴰⵣⵉⵖⵜ ⵜⴰⴷⵖⵔⴰⵏⵜ.

ⵜⵙⵙⵔⵖⴰ ⵜⵔⴰⴱⴱⵓⵜ ⴰⴷ ⵜⵉⴼⴰⵡⵜ ⵅⴼ ⵜⵎⴰⵜⴰⵔⵉⵏ ⵍⵍⵉ ⵉⵥⵍⵉⵏ ⵙ ⵡⴰⵎⵓⵏ ⴷ ⵜⴷⵍⵙⴰ ⵏ ⵜⵇⴱⵉⵍⵜ ⵜⴰⵎⴰⵣⵉⵖⵜ ⵉⴷⵔⴰⵏ, ⴰⵔ ⵜⵎⵎⴰⵍ ⵜⴰⵖⵜⵙⵜ ⵏ ⵜⵡⵜⵎⵜ ⵏ ⵓⴷⵖⴰⵔ, ⵜⵙⴼⵓⴳⵍⴰ ⵙ ⵜⵓⵙⵙⵏⴰ ⵜⴰⵎⵖⵔⴰⴱⵉⵜ.

ⵉⵡⴰⵜⵜⵙ ⵓⵙⴼⵙⵔ ⴰⴷ, ⵍⵍⵉ ⵉⴳⴰⵏ ⴰⵎⵣⵡⴰⵔⵓ ⴳ ⵙⴱⵍⵢⵓⵏ, ⴰⴷ ⴷ ⵉⵙⵙⵓⵎⴰⵏ ⵜⴰⵥⵓⵕⵉ ⵉⴽⵜⴰⵔⵏ ⵙ ⵜⵎⵢⵓⵔⵉⵏ ⵜⵉⵣⴰⵢⴽⵓⵜⵉⵏ ⴷ ⴰⴷ ⴱⴷⴷⵏ ⵅⴼ ⵉⵥⵓⵕⴰⵏ ⵏ ⵜⴰⵢⵙⵉ ⴰⴷ ⵜⴰⵣⴰⵢⴽⵓⵜ ⴷ ⵢⵓⴳⵎⵏ ⵉ ⵉⴷⵔⴰⵔⵏ ⵏ ⵡⴰⵟⵍⴰⵙ ⵉⵅⴰⵜⴰⵔⵏ.

ⴳ ⵜⴳⵓⵔⵉ ⵏⵏⵙ ⵙ ⵜⵎⵍⴷⴰ ⴰⴷ, ⵜⵏⵏⴰ ⵜⵎⵙⵇⴰⴷⵜ ⵜⴰⵎⵖⵔⴰⴱⵉⵜ ⴳ ⵙⴱⵍⵢⵓⵏ, ⴽⴰⵔⵉⵎⴰ ⴱⵏⵄⵉⵛ, ⵎⴰⵙ ⵜⴳⴰ ⵜⵎⴰⵣⵉⵖⵜ ⵢⴰⵏ ⵓⴳⵣⵣⵓⵎ ⵏ ⵜⵎⴰⴳⵉⵜ ⵜⴰⵎⵖⵔⴰⴱⵉⵜ ⵉⴱⴷⴷⵏ ⵅⴼ ⵜⵎⵢⴰⵏⵏⴰⵡⵜ ⵜⵓⵜⵍⴰⵢⴰⵏⵜ ⴷ ⵜⴷⵍⵙⴰⵏⵜ.

ⵜⵏⵏⴰ ⵎⴰⵙⵙⴰ ⴱⵏⵄⵉⵛ, ⴳ ⵓⵎⵏⵉⴷ ⴰⴷ, ⵙ ⵡⴰⵡⴰⵍ ⵏ ⴱⴰⴱ ⵏ ⵓⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⴰⴷ ⵉⵙⴽⵔ ⴳ ⵉⵅⴼ ⵏ ⵓⵙⴳⴳⵯⴰⵙ ⴰⵎⴰⵣⵉⵖ ⵜⴰⵏⵏⵓⵕⵥⵎⵜ ⵜⴰⵏⴰⵎⵓⵔⵜ, ⵜⵙⵙⴽⵜⵉ ⴷ ⵉⵏⴰⵡ ⵏ ⵓⴳⵍⵍⵉⴷ ⴱⴰⴱ ⵏ ⵓⴷⴷⵓⵔ ⴳ ⵢⵓⵍⵢⵓⵣ 2001, ⵍⵍⵉⵖ ⵉⵙⵎⴰⵢⵏⵓ ⵓⴳⵍⵍⵉⴷ ⴱⴰⴱ ⵏ ⵓⴷⴷⵓⵔ ⴰⵡⴰⵍ ⵏⵏⵙ ⵎⴰⵙ ⵜⴳⴰ ⵜⵎⴰⵣⵉⵖⵜ ⵣⴳ ⵜⵎⴰⴳⵉⵜ ⵜⴰⵎⵖⵔⴰⴱⵉⵜ, ⴷ ⵓⵍⴰ ⵉⵏⴰⵡ ⵏ ⴱⴰⴱ ⵏ ⵓⴷⴷⵓⵔ ⴳ 17 ⵓⴽⵜⵓⴱⵕ 2001, ⵍⵍⵉ ⵉⵜⵜⵓⵙⴽⴰⵔ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ.

ⵜⴷⴼⵕ ⵎⴰⵙⴷ ⴰⴷⵓⵙⵜⵓⵔ ⴰⵎⴰⵜⵓ 2011 ⵉⵙⴽⵔ ⴳ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵜⵓⵜⵍⴰⵢⵜ ⵜⵓⵏⵕⵉⴱⵜ ⵜⴰⵎⴰ ⵏ ⵜⵓⵜⵍⴰⵢⵜ ⵜⴰⵄⵕⴰⴱⵜ, ⴰⵢⵍⵍⵉ ⵉⵙⴱⵓⵖⵍⵓⵏ ⵜⴰⵎⵏⵏⴰⵡⵜ ⵜⴰⴷⵍⵙⴰⵏⵜ ⴳ ⵍⵎⵖⵔⵉⴱ.

ⵜⵉⵏⵉ ⵎⴰⵙⵙⴰ ⴱⵏⵄⵉⵛ ⵎⴰⵙⴷ ⴰⵙⴼⵙⵔ ⴰⴷ ⵉⴳⴰ ⵜⴰⵡⵀⴰⵍⵜ ⴼⴰⴷ ⴰⴷ ⴷⵔⵓⵏ ⵜⵉⵔⵎⵉⵜⵉⵏ ⵏ ⵜⵡⵜⵎⵉⵏ ⵏ ⵡⴰⵟⵍⴰⵚ ⴰⵎⵇⵔⴰⵏ, ⴷ ⵡⴰⵔⴰⵢ ⵏ ⵜⵥⵓⵕⵉ ⴰⴷ ⵜⴰⵣⴰⵢⴽⵓⵜ.

ⵣⴳ ⵜⵙⴳⴰ ⵏⵏⵙ, ⵜⵏⵏⴰ ⴽⴰⴼⵉⵜⴰ ⴱⴰⵎⴰⵔ, ⵜⴰⵏⴼⵍⵓⵙⵜ ⵏ ⵓⵙⴼⵙⵔ, ⴳ ⵡⴰⵡⴰⵍ ⵏⵏⵙ ⵉ ⵜⵙⵏⵓⵔⴰⵢⵜ ⵜⴰⵎⵖⵔⵉⴱⵉⵜ ⵉ ⵢⵉⵏⵖⵎⵉⵙⵏ, ⵎⴰⵙⴷ “ⴰⵡⵜⵜⴰⵙ ⵏ ⵓⵏⵎⵓⵇⵇⴰⵔ ⴰⴷ, ⵍⵍⵉ ⵎⵎⵓ ⵜⵜⵃⵢⵢⴰⵍⵏ ⵇⵉⵏ ⵉⵙⴳⴳⵯⴰⵙⵏ ⴷ ⵓⵣⴳⵏ, ⵉⴳⴰ ⵜ ⴰⴷ ⵎⵍⵛ ⴰⵙⵏⴼⵍⵓⵍ ⴷ ⵜⵉⵔⵎⵉⵜ ⵏ ⵜⵡⵜⵎⵉⵏ ⴰⴷ ⵏ ⵡⴰⵟⵍⴰⵚ ⴰⵎⵇⵕⴰⵏ, ⵍⵍⵉ ⵉⵙⵙⵍⵎⴰⴷⵏ ⵉ ⵓⵎⴰⴹⴰⵍ ⵜⴰⵡⵙⵙⵏⴰ ⵜⴰⵎⴰⵣⵉⵖⵜ ⵜⴰⵣⴰⵢⴽⵓⵜ”.

ⵜⵉⵏⵉ: “ⵎⴰⵅⵛⵛⴰⵢⵏ ⴰⴷ ⵏⴰⵔⵉ ⵜⴰⵥⵓⵕⵉ ⴰⴷ ⴷ ⵜⴷⵍⵙⴰ ⴰⴷ, ⵜⵃⵢⵢⵍ ⵉ ⵜⵎⵖⴰⵔⵉⵏ ⴰⴷ ⴰⵢⴷⴰ ⵙ ⵙⵖⴰⵡⵙⴰⵏⵜ ⴼⴰⴷ ⴰⴷ ⵜⵖⴰⵎⴰ ⵜⴰⵢⵙⵉ ⵏⵏⵖ”.

ⵣⴳ ⵜⵙⴳⴰ ⵏⵏⵙ, ⵉⵏⵏⴰ ⵛⵉⴳⵯ ⵓⵔⴷⵓⴼⴰⵙ, ⴰⵙⵍⵡⴰⵢ ⴷ ⵓⵏⵎⵀⴰⵍ ⵏ ⵜⴰⵍⴰⵙⵉⵏ, ⵎⴰⵙⴷ “ⴰⵙⴼⵙⵔ ⴰⴷ ⵉⴳⴰ ⵜⴰⵢⴰⴼⵓⵜ ⵏ ⵜⴰⵡⵡⵓⵔⵉ ⵉⴳⴳⵓⵜⵏ , ⴰⵡⵜⵜⴰⵙ ⵏⵏⵙ ⴰⵎⵣⵡⴰⵔⵓ ⵉⴳⴰ ⵜ ⵡⴰⵔⴰⵢ ⵏ ⵜⴰⵢⵙⵉ ⵍⵍⵉ ⵉⵍⵍⴰⵏ ⴳ ⵍⵎⵖⵔⵉⴱ ⵜⴰⵙⵓⵜⵉⵏ ⵅⴼ ⵜⴰⵙⵓⵜⵉⵏ”

ⵉⵙⵎⴷ “ⵙ ⵜⵎⵜⴷⴰ ⴰⴷ, ⴰⵔ ⵣⵣⵓⵍⵖ ⵉ ⵜⵉⵔⵉⵜ ⵉⵍⵍⴰⵏ ⴷⴰⵔ ⵜⵡⵜⵎⵉⵏ ⵏ ⵜⵎⵢⴰⵡⴰⵙⵉⵏ ⵓⵍⴰ ⴰⴽⴽⵯ ⵜⴰⵔⴰⴱⴱⵓⵜ ⵜⴰⵎⵖⵔⴰⴱⵉⵜ ⵍⵍⵉ ⵢⵓⵊⵊⴰⵏ ⴰⵙⵏⴼⴰⵕ ⴰⴷ ⴰⴷ ⵢⵉⵍⵉ”

ⵔⴰⴷ ⵢⵉⵍⵉ ⵢⴰⵏ ⵓⵙⴼⵙⵔ “ⵜⴰⵡⵍⴰⴼⵉⵏ ⵉⵜⵜⵓⵥⴹⴰⵏ” ⴰⵔ 23 ⴼⴱⵕⴰⵢⵕ.