الاتحاد المغربي للشغل يصدر بلاغا باللغة الأمازيغية ..ⴰⵙⵉⵡⴹ ⴰⵎⵓⵏⵉ ⴰⵎⵖⵔⴰⴱⵉ ⵏ ⵜⵡⵓⵔⵉ

    ⴰⵣⵓⵍⴱⵔⵉⵙ –ⴰⵙⵉⵡⴹ //

ⴷⴰ ⵉⵙⵏⵣⵓⴼ ⵓⵙⵉⵔⴰ ⴰⵎⵣⵣⴳⴰⵔ ⵏ ⵜⵙⴷⴰⵡⵉⵜ ⵜⴰⵏⴰⵎⵓⵔⵜ ⵏ ⵓⵙⵍⵎⴷ ⵍⵍⵉ ⵉⵍⵍⴰⵏ ⴷⴰⵡ ⵏ ⵡ ⴰⵎⵓⵏⵉ ⴰⵎⵖⵔⴰⴱⵉ ⵏ ⵜⵡⵓⵔⵉ ⵙ ⵡⴰⵟⵟⴰⵙ ⵏ ⵓⴱⵓⵔⵣ ⴷ ⵓⵙⵉⵎⵖⵔ,

ⵜⴰⵎⵔⵏⵉⵡⵜ ⵏ ⵉⵎⵙⴽⴰⵔⵏ ⵉⵏⵎⴰⵍⵍⴰⵏⵏ ⵉⵎⴰⵣⵉⵖⵏ ⵜⵜⵖⵏⴰⵙⵏⵉⵏ, ⵏⵏⴰ ⵉⵙⵜⵉⵏ

 ⵙ  ⵜⴽⴷⵉⵜ  ⵉ ⵉⵎⵏⵣⴰⵢⵏ ⵍⵍⵉ-ⵙ ⵏⵣⵡⴰⵔ  ⴷ ⵉ ⵓⵎⵣⵔⵓⵢ-ⵏⵏⵖ ⴰⵎⵇⵇⵔⴰⵏ ⴳ ⵓⵎⵣⴰⵖ-ⵏⵏⵖ ⵖⴼ ⵜⵖⴰⵡⵙⵉⵡⵉⵏ ⴷ ⵜⵎⵏⵜⴰⵍ ⵏ ⵉⵙⵍⵎⴰⴷⵏ ⴷ ⵜⵙⵍⵎⴰⴷⵉⵏ, ⴰ-ⵙ ⵜⵙⵙⵍⴽⴰⵏ ⵜⵙⴷⴰⵡⵉⵜ ⵜⴰⵏⴰⵎⵓⵔⵜ ⵏ ⵓⵙⵍⵎⴷ ⵍⵍⵉ ⵉⵍⵍⴰⵏ ⴷⴰⵡ ⵏ ⵡⴰⵎⵓⵏⵉ ⴰⵎⵖⵔⴰⴱⵉ ⵏ ⵜⵡⵓⵔⵉ, ⵎⴰⵙ-ⴷ ⴰⴷⴰⴼ ⵏ ⵉⵎⵖⵏⴰⵙⵏ ⴷ ⵜⵎⵖⵏⴰⵙⵉⵏ ⵉⵎⴰⴳⵍⴰⵢⵏ ⴷ ⵜⵡⵓⵔⵉ ⵜⴰⵏⵎⴰⵍⵍⴰⵏⵜ ⵜⴰⵎⵓⵏⴰⵏⵜ ⵜⴰⵏⵙⵉⵎⴰⵏⵜ, ⵢⴰⴳⴳⵓⴳⵏ/ⵢⵉⴳⵊⵏ ⵖⴼ ⴽⵔⴰ ⵉⴳⴰⵏ ⴳⴰⵔ-ⴰⵙⵙⵎⵔⵙ ⴰⵙⵔⵜⴰⵏ, ⴽⴰ ⵉⵣⵎⵎⵔⵏ ⴰⴷ ⴷ-ⵢⴰⵡⵉ ⵜⵉⵙⵇⵇⴰⵔ/ⵉⵙⵙⵓⵜⵓⵔⵏ ⵏ ⵉⵙⵎⵉⵍⵏ ⵏ ⵉⵎⵡⵓⵔⵉⵏ ⴳ ⵢⵉⴳⵔ ⵏ ⵓⵙⵍⵎⴷ, ⵢⴰⵔⵉ ⵙⵓⵍ ⵉⵣⵔⴼⴰⵏ-ⵏⵏⵙⵏ ⴷ ⵜⵡⴽⴽⴰⵙⵉⵏ-ⵏⵏⵙⵏ. ⴳ ⵓⵙⴰⵜⵉ-ⴰⴷ, ⵉⴳⴰ ⴰⵖ ⴰⴷⴷⵓⵔ, ⵏⴽⴽⵏⵉ ⴰⵙⵉⵔⴰ ⴰⵎⵣⴳⴳⴰⵔ ⵏ ⵜⵙⴷⴰⵡⵉⵜ, ⴰⴷ ⵏⵙⴳⵓⵔⵓ ⵙ ⵢⴰⵏ ⵓⴱⵓⵔⵣ ⴷ ⵓⵙⵉⵎⵖⵓⵔ ⵅⴰⵜⵔⵏⵉⵏ ⴰⵏⵙⵓⴼ-ⵏⵏⵖ ⴷ ⵓⵏⵏⵓⵕⵥⵎ ⵏ ⵉⵖⴰⵍⵉⵡⵏ-ⵏⵏⵖ ⵉ ⵉⵎⵖⵏⴰⵙⵏ ⴷ ⵜⵎⵖⵏⴰⵙⵉⵏ ⴼⵍⵙⵏⵉⵏ ⵙ ⵜⵎⵓⵏⵉ ⵜⴰⵏⵎⴰⵍⵍⴰⵏⵜ ⴷ ⵜⵉⵅⵅⵓⵜⵔⴰ/ⵜⵉⵏⴷⵉ ⵏ ⵜⵎⵏⵜⴰⵍ ⴷ ⵜⵖⴰⵡⵙⵉⵡⵉⵏ ⵏ ⵡⴰⵎⵓⵔ ⴷ ⵜⵉⵏ ⵉⵙⵎⵉⵍⵏ ⵉⵎⵡⵓⵔⵉⵏ,  ⵏⵏⴰ-ⵏⵏ-ⵢⵉⵜⵜⵉⵏ ⵖⴼ ⴳⴰⵔ-ⴰⵙⵙⵎⵔⵙ ⴰⵙⵔⵜⴰⵏ ⵉⵙⵏⵏⵢⵓⴷⴷⵓⵏ ⵉ ⵜⵙⵙⵔⵓⵙⵉⵏ ⴳⴰⵏⵉⵏ ⵎⴳⴰⵍ ⵏ ⵜⵎⵏⵜⴰⵍ ⴷ ⵜⵖⴰⵡⵙⵉⵡⵉⵏ ⵜⵉⵏⴰⵎⵓⵔⵉⵏ ⵜⵉⵎⴰⵖⵜⴰⵙⵉⵏ, ⴳⵉⵙⵏ ⵉⵎⵙⴽⴰⵔⵏ ⵉⵏⵎⴰⵍⵍⴰⵏⵏ ⵉⵎⴰⵣⵉⵖⵏ, ⵍⵍⵉ ⵙⵜⵉⵏⵉⵏ ⴰⴷⴰⴼ ⴰⵎⴳⵔⴰⵡ ⵙ ⵜⵙⴷⴰⵡⵉⵜ ⵜⴰⵏⴰⵎⵓⵔⵜ ⵏ ⵓⵙⵍⵎⴷ ⴳ ⴽⵔⴰⵢⴳⴰⵜ-ⵎⴰⵏⵉ ⴳ ⵡⴰⵎⵓⵔ, ⵉ ⵔⴰⴷ ⵉⵍⵎⵎⴰ ⵏⵉⵏⵉ, ⴰⵣⵓⵍ ⵢⴰⵜⵜⵓⵢⵏ ⵉ ⵎⴰⵕⵕⴰ ⵉⵎⵖⵏⴰⵙⵏ ⴷ ⵜⵎⵖⵏⴰⵙⵉⵏ  ⴼⵍⵙⵏⵉⵏ ⵙ ⵜⵡⵓⵔⵉ ⵜⴰⵏⵎⴰⵍⵍⴰⵏⵜ ⵜⴰⵎⵓⵏⴰⵏⵜ ⵜⴰⵏⵙⵉⵎⴰⵏⵜ, ⵉⴳⴰⵏ ⵜⴰⴷⵖⵔⵉⵜ ⴷ ⵜⴰⵎⵙⴰⵢⵜ.

ⵙ ⵜⵎⵍⴷⴰ-ⴰⴷ, ⴰⵔ ⵉⵙⵎⴰⵢⵏⵓ ⵓⵙⵉⵔⴰ ⴰⵎⵣⵣⴳⴰⵔ ⴰⵙⵙⵓⵜⵔ-ⵏⵏⵙ ⵉ ⵜⵎⴰⵡⴰⵙⵜ/ⵜⵖⵍⵉⴼⵜ ⵏ ⵓⵙⴳⵎⵉ ⴰⵏⴰⵎⵓⵔ, ⵃⵎⴰ ⴰⴷ ⵙⴰⴷⵎⵔⵏ ⵉ  ⵉⵙⵙⵓⵜⵓⵔⵏ ⵏ ⵎⴰⵕⵕⴰ ⵉⵙⵎⵉⵍⵏ ⵉⵎⵡⵓⵔⵉⵏ ⴳ ⵢⵉⴳⵔ ⵏ ⵓⵙⵍⵎⴷ, ⵙⵍⴰⵡⴰⵏⵜ-ⴰⴽⴽⵯ ⵉⵙⵙⵓⵜⵓⵔⵏ ⵏ ⵉⵙⵍⵎⴰⴷⵏ ⴷ ⵜⵙⵍⵎⴰⴷⵉⵏ ⵖⴼ-ⵉⵜⵜⵓⴱⵣⵣⴰⵣ ⵓⵎⵢⴰⵖⴰⵏ, ⵜⵜⵖⵏⴰⵙⵏⵉⵏ ⵖⴼ ⵉⵣⵔⴼⴰⵏ-ⵏⵏⵙⵏ ⵓⵖⴷⵉⵎⵏ, ⵍⵍⵉ ⵉⵍⵍⴰⵏ ⴳ ⵓⵙⴷⴰⵡ ⴰⵏⴰⵎⵓⵔ ⵏ ⵉⵙⵙⵓⵜⵓⵔⵏ ⵉⴳⴰⵏ ⵡⵉⵏ ⵜⵙⴷⴰⵡⵉⵜ  ⵜⴰⵏⴰⵎⵓⵔⵜ ⵏ ⵓⵙⵍⵎⴷ, ⵓⴽⴰⵏ ⴰⵔ ⵏⵙⵙⵍⴽⴰⵏ ⵖⴼ:

1. ⵓⵣⵓⵛⵛⵍ ⵏ ⵓⵙⵎⵀⵍ ⴷ ⵓⵣⵣⵉⴳⵣ ⵏ ⵓⵥⴰⵢⵔ/ⵡⴰⴷⴷⴰⴷ ⵓⵏⵚⵉⴱ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴷ ⵓⵙⵉⵍⴰⵡ ⵏ ⵜⵖⴷⵎⵜ ⴳⵔ ⵜⵓⵜⵍⴰⵢⵉⵏ ⵜⵓⵏⵚⵉⴱⵉⵏ.
2. ⵓⵣⵓⵛⵛⵍ ⴰⴷ ⵉⴳ ⵉⵖⴼ ⵏ ⵓⵙⴳⴳⴰⵙ ⴰⵎⴰⵣⵉⵖ, ⵜⴰⵏⵏⵓⵕⵥⵎⵜ ⵜⵓⵏⵚⵉⴱⵜ ⵉⵜⵜⵡⴰⴼⵔⴰⵏ.
3. ⵓⵣⵓⵛⵛⵍ ⵏ ⵓⵙⵎⴰⵜⴰ ⵏ ⵓⵙⵍⵎⴷ ⴷ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵉ ⵎⴰⵕⵕⴰ ⵉⵏⵍⵎⴰⴷⵏ, ⵙ ⵜⴷⵉⵔⴰⵏⵜ ⴷ ⵜⵔⴰⵜⴰⴽⵜ, ⴳ ⴽⵔⴰⵢⴳⴰⵜ ⵉⵎⵉⵔⵏ, ⴷ ⵓⵙⵃⵉⵢⵢⵍ ⵏ ⵉⵙⵓⴳⴰⵏ ⵉⵏⴼⴳⴰⵏⵏ ⵍⵍⵉ ⵉⵅⵚⵚⴰⵏ ⴰⴼⴰⴷ ⴰⴷ ⵉⵜⵜⵓⵡⴽⵉⵔ ⵓⵙⵎⴰⵜⴰ.
4. ⵓⵣⵓⵛⵛⵍ ⴰⴷ ⵜⴻⵜⵜⵓⵡⵙⴽⵉⵔ ⵜⵎⵏⵀⴰⵍⵜ ⵜⴰⵏⴰⵎⵎⴰⵙⵜ ⵉⵥⵍⵉⵏ ⵙ ⵓⵙⵍⵎⴷ ⵏ ⵜⵎⴰⵣⵉⵖⵜ ⴷ ⵜⴷⵍⵙⴰ-ⵏⵏⵙ ⵉⴽⵛⵉⵎⵏ ⴳ ⵜⵚⴽⵉⵡⵜ ⵏ ⵜⵎⴰⵡⴰⵙⵜ/ⵜⵖⵍⵉⴼⵜ ⵏ ⵓⵙⴳⵎⵉ ⴰⵏⴰⵎⵓⵔ.
5. ⵓⵣⵓⵛⵛⵍ ⵏ ⵓⵙⵔⵏⵓ ⵏ ⵉⵏⵙⵉⵜⵏ ⵉⵥⵕⴼⴰⵏⵏ ⵉⵜⵜⵡⴰⴳⴳⵏ ⵉ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴷ ⴰⵔ ⵏⵙⵙⵍⴽⴰⵏ ⵎⴰⵙ ⴱⴰⵀⵔⴰ ⴷⵔⵓⵙⵏ 400 ⵏ ⵉⵙⵍⵎⴰⴷⵏ ⵉ ⴽⵓⴷ-ⴰⵙⴳⴳⵯⴰⵙ.
6. ⵓⵣⵓⵛⵛⵍ ⴰⴷ ⵉⵜⵜⵡⴰⴽⵙ ⴽⵔⴰⵢⴳⴰⵜ ⴰⵏⴰⵡ ⵏ ⵓⵙⵏⵓⴽⴽⵎⵓ ⴷ ⵜⵍⴽⴽⴰⵡⵜ, ⵏⵏⴰ ⴳ ⴷⴷⵔⵏ ⵉⵙⵍⵎⴰⴷⵏ ⴷ ⵜⵙⵍⵎⴰⴷⵉⵏ ⵏ ⵜⵎⴰⵣⵉⵖⵜ ⴳ ⵎⵏⵏⴰⵡⵜ ⵏ ⵜⵏⵎⵀⴰⵍⵉⵏ ⴽⵓⴷ ⴰⵙⵏⵜⵉ ⵏ ⵓⵙⴳⴳⴰⵙ ⴰⵏⵎⵍⴰⵏ, ⵍⵍⵉⵖ ⴰⵙⵏ ⴰⴽⴽⴰⵏ ⴰⴷ ⵙⵙⴰⵇⵔⴰⵏ ⵜⵓⵜⵍⴰⵢⵜ ⵜⴰⵄⵔⴰⴱⵜ ⵏⵖⴷ ⵜⴰⴼⵔⴰⵏⵙⵉⵙⵜ ⴰⴼⴰⴷ ⴰⴷ ⵇⵇⵏⵏ ⵜⴰⵙⵙⴰⵔⵜ-ⵏⵏⵙⵏⵜ.

ⴳ ⵜⴳⵉⵔⴰ ⵏ ⵡⴰⵡⴰⵍ, ⴰⵔ ⵉⵙⵉⵎⵖⵓⵔ ⵓⵙⵉⵔⴰ ⴰⵎⵣⵣⴳⴰⵔ ⴱⴰⵀⵔⴰ ⵙ ⵎⴰⵕⵕ ⵉⵙⵎⵉⵍⵏ ⵉⵎⵡⵓⵔⵉⵏ ⴳ ⵢⵉⴳⵔ ⵏ ⵓⵙⵍⵎⴷ, ⴷ ⵜⵓⴳⴳⴰⵙ ⴷ ⵉⵙⴼⴰⵙⴽⵉⵡⵏ ⵍⵍⵉ ⴰⴽⴽⴰⵏ ⵉ ⵜⵏⴰⴼⵓⵜ ⵏ ⵜⵉⵏⵎⵍ ⵜⴰⵎⴰⵜⴰⵢⵜ, ⴷ ⴰⵔ ⴷⴰⵖ ⵉⵙⵙⵍⴽⴰⵏ ⵓⵙⵉⵔⴰ ⴰⵎⵣⵣⴳⴰⵔ, ⵎⴰⵙⴷ ⵜⴰⵙⴷⴰⵡⵉⵜ ⵜⴰⵏⴰⵎⵓⵔⵜ ⵏ ⵓⵙⵍⵎⴷ ⵍⵍⵉ ⵉⵍⵍⴰⵏ ⴷⴰⵡ ⵏ ⵡⴰⵎⵓⵏⵉ ⴰⵎⵖⴰⵔⴱⵉ ⵏ ⵜⵡⵓⵔⵉ ⵜⴳⴰ ⴷ ⵔⴰⴷ ⴱⴷⴷⴰ ⵜⵖⴰⵎⴰ ⵉⵖⵉⵍ ⵉⵎⵇⵇⵓⵔⵏ ⵉⵏⵏⵓⵕⵥⵎⵏ ⴷ  ⵓⵏⵎⴰⵍⵍⵓ ⴰⵎⵓⵏⴰⵏ ⵉⴷⵜⵜⴰⵏ ⵏ ⴽⵔⴰⵢⴳⴰⵜ ⴰⵙⵎⵉⵍ ⴰⵎⵡⵓⵔⵉ ⴳ ⵢⵉⴳⵔ ⵏ ⵓⵙⵍⵎⴷ, ⵢⴰⴳⴳⵓⴳⵏ/ⵢⵉⴳⵊⵏ ⵖⴼ ⴽⵔⴰⵢⴳⴰⵜ ⴳⴰⵔ-ⴰⵙⵙⵎⵔⵙ ⴰⵎⵍⴷⴰⵏ ⵏⵖⴷ ⴳⴰⵔ-ⴰⵙⵙⵎⵔⵙ ⴰⵙⵔⵜⴰⵏ ⵉⵏⵏⵓⴽⵎⴰⵏ.

ⵜⵓⴷⵔⵜ ⵉ ⵉⵎⵡⵓⵔⵉⵏ ⴷ ⵜⵎⵡⵓⵔⵉⵏ ⵏ ⵓⵙⵍⵎⴷ

ⵜⵓⴷⵔⵜ ⵉ ⵡⴰⵎⵓⵏⵉ ⵏ ⴰⵎⵖⵔⴰⴱⵉ ⵏ ⵜⵡⵓⵔⵉ   –ⵜⵓⴷⵔⵜ ⵉ ⵜⵙⴷⴰⵡⵉⵜ ⵜⴰⵏⴰⵎⵓⵔⵜ ⵏ ⵓⵙⵍⵎⴷ.