تارودانت: الزجالة هند مثوق، تغازل ذكريات الزمن الجميل ” واش عقلتو على ديك الأيام…؟”

زين الأيام
جيت نحكي
نسولكم واش عقلتو على ديك الأيام
لسانها حكيم…؟
جلسة تلعب على جوارحك كاملين
الصغير محتارم الكبير
قدام المجمر الأحباب دايرين
كانت الضحكة من القلب
تبين ضراسك كاملين
كانت اللقمة قليلة
القنع كثير
لقمة جامعة العيلة على الميدة فارحين
آه..! أيام كانت الجدة تحكي حكايات جميلة
تطير النعاس من العين
الديك يصيح وحنا باقي فايقين
واش معايا تقولو أيامنا كانت زينة مالها مثيل
من شوقنا لها نتفكروها يطيح علينا الضيم
تفكرنا فجدودنا رحمة واسعة عليهم كاملين
ناس فواهم ناطقة بالحكمة

أنا اليوم نتأسف أسفي عظيم
على الجدة اللي غراتها الأفلام الرخيصة
نساتها حكاية أُمُّنَا الغولة وسيرة النبي وصحابوا الطاهرين
حنانها ماشبعوش حفيد
مشا حنانها وتباع حب الحفيد
كان مقامها فالعيلة شانوا كبير
التكنولوجيا قسحات القلب الحنين
اللي كنا وسط منو كاملين
من حبنا لها رجعتني الأيام
نصنع اللي كان لها زينة فكل يوم

وكل عيد

نصنع كحل وحناء وسواك
تتزين به مجموعة النساء العقلات
فوسط بيوتهم حجبات